آسٹریلیا نے ایرانی شہریوں پر عارضی سفری پابندیاں عائد کرنے کا اعلان کر دیا ہے، جس کے تحت وزیٹر ویزا رکھنے والے ایرانی شہریوں کے ملک میں داخلے پر پابندی لگا دی گئی ہے۔
ایران نے امریکا سے کسی بھی مذاکرات کی تردید کر دی
خبر ایجنسی کے مطابق آسٹریلوی وزیر داخلہ نے اپنے بیان میں کہا کہ حکومت نے یہ فیصلہ امیگریشن نظام کی سالمیت کو برقرار رکھنے کے لیے کیا ہے۔ ان کا کہنا تھا کہ موجودہ علاقائی صورتحال کے باعث خدشہ ہے کہ بعض وزیٹر ویزا ہولڈرز مقررہ مدت کے اندر واپس اپنے ملک نہ جا سکیں۔
وزیر داخلہ کے مطابق یہ اقدام عارضی نوعیت کا ہے اور حالات کے مطابق اس پر نظرثانی کی جائے گی۔ حکام کا کہنا ہے کہ حکومت امیگریشن قوانین پر سختی سے عملدرآمد یقینی بنانا چاہتی ہے تاکہ کسی بھی ممکنہ خلاف ورزی سے بچا جا سکے۔
ماہرین کے مطابق ایران سے متعلق جاری کشیدگی کے تناظر میں مختلف ممالک امیگریشن اور سکیورٹی پالیسیوں پر نظرثانی کر رہے ہیں، اور آسٹریلیا کا یہ فیصلہ بھی اسی سلسلے کی کڑی قرار دیا جا رہا ہے۔
