کراچی میں پیشہ ور بھکاریوں کے خلاف کارروائیوں کا دائرہ کار وسیع کر دیا گیا ہے۔ ایس ایس پی ڈسٹرکٹ ساؤتھ Mehzor Ali کے احکامات پر تھانہ بوٹ بیسن پولیس نے منظم انداز میں بھیک مانگنے والے عناصر کے خلاف خصوصی کریک ڈاؤن کرتے ہوئے 10 افراد کو گرفتار کر لیا۔
پولیس کے مطابق ملزمان شہر کے مختلف اہم تجارتی اور رہائشی علاقوں میں گروہ کی صورت میں بھیک مانگنے میں ملوث تھے۔ کارروائی خفیہ اطلاع پر عمل میں لائی گئی، جس کے دوران ملزمان کو حراست میں لے کر ان کے خلاف بیگر ایکٹ کے تحت مقدمات درج کر لیے گئے ہیں۔
گرفتار افراد میں مشتاق احمد، سفید خان، عامر، علی جان، نیاز، صحبت علی، اسحاق، محمد سلمان، شکیل اور رفیق شامل ہیں۔ پولیس حکام کا کہنا ہے کہ یہ افراد پیشہ ورانہ طور پر بھیک مانگنے کے عمل میں ملوث تھے اور شہریوں کو ہمدردی کے نام پر گمراہ کر کے رقم وصول کرتے تھے۔
ایس ایس پی ساؤتھ نے واضح کیا ہے کہ شہر میں منظم بھکاری مافیا کے خلاف زیرو ٹالرنس پالیسی اپنائی گئی ہے اور ایسے عناصر کے خلاف بلا امتیاز کارروائیاں جاری رہیں گی۔ ان کا کہنا تھا کہ عوام الناس کو پیشہ ور بھکاریوں کی حوصلہ شکنی کرنی چاہیے اور مشتبہ سرگرمیوں کی اطلاع فوری طور پر پولیس کو دینی چاہیے۔
پولیس کا مزید کہنا ہے کہ شہر میں امن و امان کے قیام اور پیشہ ور جرائم پیشہ عناصر کے خاتمے کے لیے خصوصی مہم جاری رہے گی۔
