وزیر اعظم شہباز شریف نے کہا ہے کہ معرکۂ حق میں کامیابی کے بعد پاکستانی لڑاکا طیاروں کی عالمی سطح پر مانگ میں اضافہ ہوا ہے اور متعدد ممالک طیاروں کے حصول کے لیے پاکستان سے رابطے میں ہیں، جس سے ملکی معیشت کو فائدہ پہنچے گا۔
وزیر اعظم کی زیر صدارت وفاقی کابینہ کا اجلاس منعقد ہوا۔ اجلاس کے اعلامیے کے مطابق وزارتِ خزانہ نے اسٹیٹ بینک کی جانب سے جاری ہونے والے کرنسی نوٹوں کے نئے ڈیزائن پر کابینہ کو بریفنگ دی۔ وفاقی کابینہ نے نئے کرنسی نوٹوں کے ڈیزائن پر مزید غور کے لیے کابینہ کمیٹی تشکیل دے دی۔
بریفنگ میں بتایا گیا کہ نئے کرنسی نوٹ جدید عصری تقاضوں کے مطابق ڈیزائن کیے جا رہے ہیں اور اس مقصد کے لیے بین الاقوامی ماہرین کی خدمات حاصل کی گئی ہیں۔
اجلاس میں پرائیویٹ حج پالیسی 2027 تا 2030 کے مسودے کو مزید غور کے لیے حج پالیسی کمیٹی کو بھجوانے کی ہدایت بھی کی گئی۔ وفاقی کابینہ نے کابینہ کمیٹی برائے توانائی کے 24 دسمبر 2025 اور اقتصادی رابطہ کمیٹی کے 23 دسمبر 2025 کے اجلاسوں کے فیصلوں کی توثیق کر دی۔
وفاقی کابینہ سے خطاب کرتے ہوئے وزیر اعظم شہباز شریف نے کہا کہ سکیورٹی فورسز دہشت گردی کے خاتمے کے لیے پرعزم ہیں اور دہشت گردی کا مکمل صفایا کرکے دم لیں گی۔
انہوں نے کہا کہ پاکستان نے معاشی میدان میں قلیل عرصے میں نمایاں پیشرفت کی ہے، معاشی استحکام حاصل کر لیا گیا ہے اور اب ترقی کے لیے عملی اقدامات کیے جائیں گے۔ وزیر اعظم نے ورلڈ لبرٹی فنانشل کے ساتھ مفاہمتی یادداشت پر دستخط کو خوش آئند قرار دیتے ہوئے کہا کہ اس ایم او یو سے ملکی معیشت کو فائدہ پہنچے گا۔
