اسپیشل انویسٹیگیشن یونٹ (SIU) نے کراچی کے مختلف علاقوں میں منشیات فروشوں کے خلاف اہم کارروائیاں کرتے ہوئے عادی جرائم پیشہ اور سابقہ ریکارڈ یافتہ 6 ملزمان کو گرفتار کر لیا۔
ایس ایس پی شعیب میمن کے مطابق گرفتار ملزمان کے خلاف منشیات اور غیر قانونی اسلحے کے متعدد مقدمات درج ہیں، اور ان کی گرفتاری کراچی میں منشیات کی روک تھام کے لیے ایک اہم پیش رفت ہے۔
کارروائیاں تھانہ کھوکھرآپار، پاک کالونی، جمشید کوارٹر اور ملیر سٹی کی حدود میں کی گئیں۔ گرفتار ملزمان میں عامر علی، عبدالرؤف، شاہان، قاسم، حامد اور عدنان شامل ہیں۔
چھاپوں کے دوران ملزمان کے قبضے سے 2 کلو سے زائد تنزانیہ آئس اور ہیروئن برآمد ہوئی، جن کی مالیت لاکھوں روپے بتائی گئی ہے۔
تمام گرفتار ملزمان کے خلاف ایس آئی یو/ سی آئی اے میں مقدمہ درج کر لیا گیا ہے اور مزید تفتیش جاری ہے تاکہ منشیات کی سپلائی چین تک پہنچا جا سکے۔
