النصر اور پرتگال کے اسٹار فٹبالر کرسٹیانو رونالڈو نے واضح کیا ہے کہ وہ رواں ماہ امریکہ میں ہونے والے کلب ورلڈ کپ میں شرکت نہیں کریں گے، حالانکہ مختلف کلبوں کی جانب سے انہیں کھیلنے کی پیشکشیں کی گئی تھیں۔
ورلڈ کپ کوالیفائر نیدرلینڈز نے فن لینڈ کو 0-2 سے شکست دے دی ڈیپے اور ڈمفریز کے گول
40 سالہ رونالڈو کے مستقبل سے متعلق قیاس آرائیاں اس وقت شدت اختیار کر گئیں جب فیفا کے صدر جیانی انفانٹینو نے عندیہ دیا کہ النصر کی کوالیفائی نہ کرنے کے باوجود رونالڈو کلب ورلڈ کپ کا حصہ بن سکتے ہیں۔ تاہم، رونالڈو نے ایسی خبروں کو مسترد کر دیا ہے۔
رونالڈو نے کہا:
"یہ عملی طور پر میرا فیصلہ ہے کہ میں کلب ورلڈ کپ میں نہیں کھیلوں گا، حالانکہ مجھے بہت سی دعوتیں موصول ہوئیں۔”
النصر کے اسپورٹس ڈائریکٹر، فرنینڈو ہیرو نے گزشتہ ماہ بتایا تھا کہ وہ رونالڈو کے ساتھ معاہدے میں توسیع پر بات چیت کر رہے ہیں، لیکن متعدد کلبوں نے ان کے لیے دلچسپی ظاہر کی ہے۔
سوشل میڈیا پر النصر کے سیزن کے آخری میچ کے بعد رونالڈو نے ایک پیغام میں لکھا:
"یہ باب ختم ہوا، کہانی؟ ابھی بھی لکھا جا رہا ہے۔”
مزید برآں، نیشنز لیگ کے سیمی فائنل میں پرتگال نے جرمنی کو 1-2 سے شکست دی جس میں فیصلہ کن گول رونالڈو نے کیا۔ اب فائنل میں پرتگال کا مقابلہ اسپین سے ہے۔
فائنل کو رونالڈو اور بارسلونا کے 17 سالہ نوجوان اسٹار لامین یامل کے درمیان مقابلہ قرار دیا جا رہا ہے۔ تاہم، رونالڈو نے کہا کہ:
"یہ ہمیشہ ہوتا آیا ہے — ‘کرسٹیانو بمقابلہ فلاں’۔ 20 سال ہو گئے، اب یہ مجھے پریشان نہیں کرتا۔ حقیقت یہ ہے کہ یہ ایک ٹیم بمقابلہ دوسری ٹیم ہے۔”
انہوں نے مزید کہا کہ وہ اپنی ریٹائرمنٹ کی دہلیز پر ہیں اور اب ان کی توجہ صرف پرتگال کی کارکردگی پر مرکوز ہے۔
