چیئرمین پاکستان پیپلز پارٹی بلاول بھٹو زرداری نے خیبرپختونخوا کے صدر محمد علی شاہ باچا سے ٹیلیفونک رابطہ کیا اور پشاور میں پیپلزپارٹی کی ریلی کے دوران کارکنان پر ہونے والے تشدد سے متعلق دریافت کیا۔ بلاول بھٹو نے ریلی کے انعقاد پر پارٹی رہنماؤں اور کارکنوں کو شاباش دیتے ہوئے کہا کہ خیبرپختونخوا حکومت پیپلزپارٹی کے پرامن احتجاج سے بوکھلاہٹ کا شکار ہے، اسی لیے آنسو گیس کی شیلنگ جیسے ہتھکنڈے استعمال کیے جا رہے ہیں۔
حج کا سچا ارادہ القذافی نام کی رکاوٹ دو بار پرواز کی واپسی پھر بھی عامر کی روانگی سوشل میڈیا پر جذباتی کہانی وائرل
بلاول بھٹو نے کہا کہ خیبرپختونخوا حکومت کی کرپشن، لاقانونیت اور بڑھتی ہوئی بے روزگاری کے خلاف آواز بلند کرنے والے عوام پر تشدد قابلِ مذمت ہے۔ انہوں نے اعلان کیا کہ اب صوبہ بچاؤ تحریک کو گلی گلی، کوچہ کوچہ پھیلایا جائے گا۔
یاد رہے کہ گزشتہ شب پشاور کے اسمبلی چوک پر پاکستان پیپلز پارٹی کی جانب سے صوبہ بچاؤ مہم کے سلسلے میں احتجاجی ریلی نکالی گئی تھی، جہاں پارٹی کے مرکزی سیکریٹری جنرل ہمایوں خان کی تقریر کے دوران پولیس نے مظاہرین پر آنسو گیس کی شیلنگ کر دی تھی۔ اس واقعے کے بعد مظاہرین مشتعل ہو گئے اور پی ٹی آئی کے احتجاجی کیمپ کو نذر آتش کر دیا۔
بلاول بھٹو کا کہنا تھا کہ خیبرپختونخوا حکومت کی عوام دشمن پالیسیوں کے خلاف احتجاج ہر شہری کا جمہوری حق ہے، اور پیپلزپارٹی اپنے کارکنوں کے ساتھ شانہ بشانہ کھڑی ہے۔
