نوشہرو فیروز: مورو دادو بائی پاس پر متنازعہ کینالز کے خلاف جاری احتجاجی دھرنے کے دوران پولیس اور مظاہرین کے درمیان شدید تصادم ہوا۔ جھڑپوں میں ایک پولیس اہلکار اور تین کارکنان سمیت کل چار افراد زخمی ہوگئے۔ مظاہرین کی جانب سے وزیر داخلہ سندھ ضیا الحسن لنجار کے گھر کو آگ لگا دی گئی، جس سے گھر کو شدید نقصان پہنچا۔
دھرنے کے دوران فائرنگ کا تبادلہ ہوا، جس سے علاقے میں خوف و ہراس پھیل گیا۔ زخمیوں کو فوری طور پر قریبی اسپتال منتقل کر دیا گیا ہے۔ پولیس نے علاقے میں حفاظتی اقدامات سخت کر دیے اور تمام دکانیں اور مارکیٹیں بند کرا دی گئیں تاکہ مزید ناخوشگوار واقعات سے بچا جا سکے۔
وزیر داخلہ سندھ ضیا الحسن لنجار نے نجی ٹی وی سے گفتگو میں کہا کہ وہ واقعے کی غیر جانبدارانہ تحقیقات کروائیں گے اور پرامن احتجاج کی آڑ میں بدامنی پھیلانے والوں کو ہرگز برداشت نہیں کیا جائے گا۔
