ایم کیو ایم کے سربراہ ڈاکٹر خالد مقبول صدیقی نے بجلی کی قیمتوں میں کمی پر پوری قوم کو مبارکباد پیش کرتے ہوئے کہا ہے کہ یہ فیصلہ اتحادی حکومت کے اس مشترکہ عزم کی عکاسی کرتا ہے کہ ملک کو ایک بار پھر ترقی کی راہ پر گامزن کیا جائے۔
اپنے بیان میں انہوں نے کہا کہ عام پاکستانیوں کی خوشحالی ہی ملک کی ترقی کا اصل زینہ ہے۔ "ہم نے سیاست کے بجائے مملکت کو ترجیح دی ہے،” ڈاکٹر خالد مقبول نے کہا۔ ان کے مطابق بجلی کی قیمتوں میں کمی عوام، معیشت اور صنعت کے لیے ایک بڑا ریلیف ہے، جو کہ مشکل مگر قومی امنگوں سے ہم آہنگ فیصلہ ہے۔
انہوں نے مزید کہا کہ ملک کو ڈیفالٹ سے بچانا، پالیسی ریٹ میں نمایاں کمی اور مہنگائی پر قابو پانا ان دلیرانہ فیصلوں کا نتیجہ ہے جو حکومت نے مشکل وقت میں کیے۔ ان کا کہنا تھا کہ بجلی کی قیمتوں میں کمی مہنگائی میں مزید کمی کا باعث بنے گی۔
ڈاکٹر خالد مقبول صدیقی نے اس فیصلے پر وزیر اعظم اور پوری حکومت کا شکریہ ادا کیا اور امید ظاہر کی کہ ایسے ہی فیصلے ملک کو معاشی طور پر مستحکم بنانے میں مددگار ثابت ہوں گے۔
