تشکر نیوز: خیبرپختونخوا کے مختلف علاقوں میں پاک فوج کی جانب سے دہشتگردوں کے خلاف تین کامیاب کارروائیاں کی گئیں، جن میں 22 دہشتگردوں کو ہلاک کیا گیا۔ ان کارروائیوں کے دوران دہشتگردوں سے مقابلہ کرتے ہوئے پاک فوج کے 6 بہادر جوانوں نے جام شہادت نوش کیا۔
دکی: ایف سی چوکی پر حملے میں دوسرا سپاہی بھی شہید
پاک فوج کے شعبہ تعلقات عامہ (آئی ایس پی آر) کے مطابق پہلی کارروائی ٹانک کے علاقے گل امام میں کی گئی، جہاں 9 دہشتگردوں کو نشانہ بنایا گیا۔ علاقے کو مکمل کلیئر کرنے کے لیے سرچ آپریشن جاری ہے۔ دوسری بڑی کارروائی شمالی وزیرستان میں کی گئی، جہاں 10 دہشتگردوں کو جہنم واصل کیا گیا۔
تھل کے علاقے میں دہشتگردوں کی جانب سے چیک پوسٹ پر حملہ کیا گیا، جسے فورسز نے بہادری سے ناکام بنایا۔ اس حملے کے دوران پاک فوج کے 6 سپاہیوں نے جرات کا مظاہرہ کرتے ہوئے اپنی جانوں کا نذرانہ پیش کیا جبکہ 3 دہشتگرد ہلاک ہوئے۔
ترجمان پاک فوج کا کہنا ہے کہ تمام علاقے میں کلیئرنس آپریشن جاری ہے تاکہ کسی بھی باقی ماندہ دہشتگرد کو ختم کیا جا سکے۔ انہوں نے اس عزم کا اظہار کیا کہ دہشتگردی کے خاتمے کے لیے پاک فوج کسی قربانی سے دریغ نہیں کرے گی۔
