کراچی: وزیراعلیٰ سندھ سید مراد علی شاہ کی زیر صدارت صوبائی کابینہ کا اجلاس وزیراعلیٰ ہاؤس میں منعقد ہوا، جس میں مختلف محکموں سے متعلق 29 ایجنڈا آئٹمز پر غور کیا گیا۔ اجلاس میں گورننس اصلاحات، صحت، زراعت، توانائی، رہائشی مکانات کی تعمیر نو اور سرکاری اراضی کے انتظام سمیت اہم امور زیر بحث آئے۔
ترجمان وزیراعلیٰ سندھ عبدالرشید چنا کے مطابق اجلاس میں صوبائی وزراء، مشیران، معاونینِ خصوصی، چیف سیکریٹری اور دیگر اعلیٰ حکام نے شرکت کی۔ کابینہ نے مختلف سرکاری محکموں سے متعلق امور کا جائزہ لیا۔
اجلاس کے دوران وزیراعلیٰ سندھ سید مراد علی شاہ نے کابینہ کو اپنے حالیہ دورۂ چین کے حوالے سے بریفنگ دی اور دورے کی دعوت دینے پر چینی حکومت کا شکریہ ادا کیا۔
وزیراعلیٰ سندھ نے چین کے ساتھ سرمایہ کاری، تجارت، ٹیکنالوجی، توانائی اور زراعت کے شعبوں میں تعاون بڑھانے کے مواقع پر تبادلۂ خیال سے متعلق کابینہ کو آگاہ کیا۔ انہوں نے ترقیاتی شعبوں میں دونوں فریقوں کے درمیان باہمی تعاون مزید مضبوط بنانے کے امکانات بھی اجاگر کیے۔
اجلاس میں گورننس اور عوامی خدمات کی بہتری سے متعلق امور کے ساتھ صحت، زرعی ترقی، توانائی، رہائشی مکانات کی تعمیر نو اور سرکاری اراضی کے مؤثر انتظام سے متعلق ایجنڈا آئٹمز بھی زیر غور آئے۔
