شہر قائد میں آئندہ چند روز موسم شدید گرم اور خشک رہنے کا امکان ہے۔ محکمہ موسمیات کے مطابق زیادہ سے زیادہ درجہ حرارت 39 ڈگری سینٹی گریڈ تک پہنچ سکتا ہے۔
نومبر سے موسم میں تبدیلی متوقع
محکمہ موسمیات کے مطابق کراچی میں سمندری اور بلوچستان سے آنے والی شمال مغربی ہواؤں کے اثرات نمایاں رہ سکتے ہیں۔ اکتوبر میں گرمی معمول کے موسمی رجحان کا حصہ ہے۔
ماہرین کے مطابق یہ صورتحال موسم کی تبدیلی کے عمل سے جڑی ہے۔ اس دوران موسم سرما کی ہوائیں بتدریج اپنا اثر دکھانا شروع کرتی ہیں۔
دسمبر میں سردی بڑھنے کا امکان
ڈپٹی ڈائریکٹر محکمہ موسمیات کراچی انجم نذیر ضیغم کے مطابق نومبر کے وسط سے صبح اور رات کے اوقات میں خنکی محسوس ہونے کا امکان ہے۔
دسمبر کے آغاز سے وسط تک موسم سرد ہونا شروع ہوسکتا ہے۔ تاہم، رواں سال غیر معمولی سردی پڑنے کے امکانات نہیں ہیں۔
محکمہ موسمیات کے مطابق سردیوں کے مقررہ دورانیے میں موسم معمول کے مطابق سرد رہنے کی توقع ہے۔
