ریلوے پولیس اور سٹی وارڈنز کے درمیان تنازع کے بعد نامعلوم افراد نے ریلوے افسر کے گھر اور دفاتر کے باہر کچرا پھینک دیا۔
وزیراعلیٰ ہاؤس کے قریب ڈی ایس ریلوے کے گھر کے دروازے پر کچرا ڈالا گیا۔ آئی آئی چندریگر روڈ پر ریلوے دفاتر کے باہر بھی کچرا پھینکا گیا۔
شارع فیصل پر بھی کچرا پھینکنے کی اطلاع
اطلاعات کے مطابق شارع فیصل پر ڈرگ روڈ کے قریب بھی کچرا پھینکا گیا۔
تاہم متعلقہ حکام تاحال یہ معلوم نہیں کرسکے کہ کچرا کس نے اور کیوں پھینکا۔ واقعات کا وقت بھی واضح نہیں ہوسکا۔
پولیس میں شکایت درج نہیں
واقعے کے حوالے سے اب تک پولیس کو کوئی شکایت موصول نہیں ہوئی۔ حکام کی جانب سے بھی تاحال کوئی تفصیلی بیان سامنے نہیں آیا۔
یہ واقعات ریلوے پولیس اور سٹی وارڈنز کے درمیان تنازع کے بعد سامنے آئے ہیں۔ اس تنازع میں ایک سٹی وارڈنز افسر نے ریلوے اہلکاروں پر اغوا اور تشدد کے الزامات عائد کیے تھے۔
