شہر کے مختلف علاقوں میں پیش آنے والے دو حادثات میں ایک کمسن بچے سمیت دو افراد جاں بحق ہوگئے۔ سرجانی ٹاؤن میں مکان کی دیوار گرنے سے 6 سالہ بچہ ملبے تلے دب گیا۔ دوسری جانب شارع فیصل پر ٹیکنالوجی پارک کی عمارت کی چھت سے گرنے کے باعث ایک ملازم ہلاک ہوگیا۔
سرجانی ٹاؤن میں دیوار گرنے سے بچہ جاں بحق
سرجانی ٹاؤن کے علاقے لیاری 36 میں خلفائے راشدین مسجد کے قریب ایک مکان کی دیوار گر گئی۔ پولیس کے مطابق 6 سالہ عبدالغنی ولد عبداللہ گھر میں کھیل رہا تھا کہ دیوار اس پر آگری۔
بچہ ملبے تلے دب گیا اور سر پر گہری چوٹ آنے کے باعث جاں بحق ہوگیا۔ چھیپا ایمبولینس نے لاش عباسی شہید اسپتال منتقل کی۔
پولیس نے قانونی کارروائی مکمل کرنے کے بعد بچے کی لاش ورثا کے حوالے کردی۔
ٹیکنالوجی پارک کی چھت سے گر کر ملازم ہلاک
دوسرا واقعہ صدر تھانے کی حدود میں شارع فیصل پر واقع ٹیکنالوجی پارک کی عمارت میں پیش آیا۔ پولیس کے مطابق عمارت کی چھت سے گرنے کے باعث 55 سالہ ایمانوئل ولد عنایت مسیح جاں بحق ہوگیا۔
متوفی کی لاش قانونی کارروائی کے لیے جناح اسپتال منتقل کی گئی۔ پولیس کے مطابق ایمانوئل ٹیکنالوجی پارک میں گزشتہ 15 سال سے سپروائزر کے طور پر کام کر رہا تھا۔
پولیس کا کہنا ہے کہ وہ کام کے دوران عمارت کی چھت سے گرا۔ قانونی کارروائی کے بعد لاش ورثا کے حوالے کردی گئی۔
