کراچی: آئی جی سندھ جاوید عالم اوڈھو سے اقوام متحدہ کے ادارے یونیسف کے وفد نے سینٹرل پولیس آفس کراچی میں ملاقات کی۔ اجلاس میں پولیو مہمات کی سیکیورٹی اور بچوں کے تحفظ سے متعلق امور زیرِ بحث آئے۔
ملاقات میں ڈی آئی جی ہیڈکوارٹرز، آئی ٹی حکام، ایڈیشنل آئی جیز آپریشنز اور ایڈمن سمیت دیگر پولیس افسران شریک ہوئے۔ ایس پی فارنرز سیکیورٹی نے بھی اجلاس میں شرکت کی۔
یونیسف وفد کی قیادت ڈاکٹر جارج نے کی
یونیسف وفد کی قیادت ڈاکٹر جارج جی کیراووٹا نے کی۔ وہ سندھ میں پولیو ٹیم کے سربراہ اور یونیسف کے چیف فیلڈ آفس کے انچارج ہیں۔
وفد میں یونیسف پاکستان کے سیکیورٹی مینیجر سداحمد، چائلڈ پروٹیکشن آفیسر مہوش ماریا اور سیکیورٹی آفیسر بارک اللہ خان شامل تھے۔ اقوام متحدہ کے محکمہ برائے تحفظ و سلامتی (UNDSS) کے فیلڈ سیکیورٹی ایسوسی ایٹ حسن عریب بھی موجود تھے۔
سندھ پولیس کے سیکیورٹی انتظامات کو سراہا
یونیسف وفد نے پولیو مہمات اور اقوام متحدہ کے دن کی تقریبات کے دوران سندھ پولیس کے سیکیورٹی انتظامات پر اطمینان کا اظہار کیا۔
وفد نے اقوام متحدہ کے اداروں اور عملے کی حفاظت یقینی بنانے پر سندھ پولیس کی کوششوں کو سراہا۔ اس موقع پر پولیس حکام کا شکریہ بھی ادا کیا گیا۔
کراچی: 120 موبائل فونز برآمد، مبینہ منظم گروہ کا اہم رکن گرفتار
بچوں کے تحفظ اور دوستانہ پولیسنگ پر گفتگو
ملاقات میں پولیو مہمات کے دوران سیکیورٹی مزید مؤثر بنانے پر تبادلہ خیال ہوا۔ شرکا نے متعلقہ اداروں کے درمیان رابطے مضبوط کرنے کی ضرورت پر بھی زور دیا۔
بچوں کے تحفظ، ان کے حقوق کے فروغ اور دوستانہ پولیسنگ کے طریقۂ کار پر بھی گفتگو ہوئی۔
آئی جی سندھ جاوید عالم اوڈھو نے کہا کہ بچوں کا تحفظ اور انہیں محفوظ ماحول فراہم کرنا سندھ پولیس کی اہم ترجیحات میں شامل ہے۔
انہوں نے کہا کہ پولیو مہمات اور اقوام متحدہ کے اداروں و عملے کی سیکیورٹی کے لیے متعلقہ اداروں سے تعاون مزید بہتر بنایا جائے گا۔
ملاقات کے اختتام پر یادگاری شیلڈز کا تبادلہ کیا گیا۔
