نارتھ کراچی میں کینیڈا سے واپس آنے والے بزرگ میاں بیوی قتل، لاشیں گھر سے برآمد

نارتھ کراچی میں گھر سے کینیڈا سے واپس آنے والے بزرگ میاں بیوی کی گلا کٹی لاشیں برآمد ہوئی ہیں۔ پولیس نے واقعے کی تحقیقات شروع کردی ہیں۔

ایکسپریس نیوز کے مطابق واقعہ سر سید تھانے کی حدود میں بی اماں پارک کے قریب پیش آیا۔ میاں بیوی مکان کی دوسری منزل پر رہائش پذیر تھے۔

مقتولین کی شناخت ہوگئی

ابتدائی معلومات کے مطابق مقتولین کی شناخت محمد یامین ولد خدا بخش اور نفیس اختر کے نام سے ہوئی ہے۔ دونوں کی عمریں تقریباً 65 سے 70 سال بتائی گئی ہیں۔

اطلاعات کے مطابق میاں بیوی کچھ عرصہ قبل کینیڈا سے پاکستان منتقل ہوئے تھے۔ وہ نارتھ کراچی کے مذکورہ مکان میں رہائش پذیر تھے۔

پولیس اور کرائم سین یونٹ کی کارروائی

واقعے کی اطلاع ملنے پر ایس ڈی پی او خواجہ اجمیر نگری، ایس ایچ او سر سید تھانے، پولیس نفری اور کرائم سین یونٹ موقع پر پہنچ گئے۔

پولیس اور کرائم سین یونٹ نے جائے وقوعہ سے شواہد جمع کیے۔ ابتدائی معلومات کے مطابق دونوں کو تیز دھار آلے سے قتل کیا گیا۔

دہرے قتل کی تحقیقات جاری

ایس ایس پی سینٹرل ڈاکٹر عمران خان نے واقعے کی تصدیق کی۔ ان کے مطابق مقتولین کی لاشیں قانونی کارروائی کے لیے عباسی شہید اسپتال منتقل کردی گئی ہیں۔

ایس ایس پی کے مطابق میاں بیوی کو تیز دھار آلے سے قتل کیے جانے کا شبہ ہے۔ دہرے قتل کی وجوہات جاننے کے لیے مختلف پہلوؤں سے تحقیقات جاری ہیں۔