وزیراعلیٰ سندھ سید مراد علی شاہ نے وزیر آبپاشی جام خان شورو کے ہمراہ چین کے شہر ووہان کے ہانیانگ ڈسٹرکٹ میں ایچ بی ایس زیڈ کمپنی کا دورہ کیا۔ اس موقع پر کراچی کے لیے کے فور پائپ لائن اور سکھر بیراج کی بحالی کے منصوبوں پر بات چیت ہوئی۔
مراد علی شاہ نے کہا کہ کراچی کو پانی فراہم کرنے کے لیے 100 کلومیٹر طویل پائپ لائن بچھائی جائے گی۔ سندھ حکومت اس منصوبے پر جلد کام شروع کرنا چاہتی ہے۔
حکام کے مطابق چینی کمپنی نے پائپ لائن بچھانے کے منصوبے پر آمادگی ظاہر کردی ہے۔ وزیراعلیٰ سندھ نے کمپنی کو منصوبے پر جلد کام شروع کرنے کی دعوت دی۔
سکھر بیراج کے گیٹس کا معائنہ
وزیراعلیٰ سندھ نے دورے کے دوران سکھر بیراج کے لیے چین میں تیار کیے جانے والے گیٹس کا معائنہ بھی کیا۔ انہیں گیٹس کی تیاری اور بحالی کے منصوبے پر پیش رفت سے متعلق بریفنگ دی گئی۔
حکام کے مطابق سکھر بیراج کے 54 دریائی گیٹس میں سے 44 تبدیل کرکے فعال کردیے گئے ہیں۔ ان کے آپریٹنگ سسٹم بھی تبدیل کیے گئے ہیں، جبکہ متعلقہ مقامات پر سول مرمت مکمل ہوچکی ہے۔
بریفنگ میں بتایا گیا کہ باقی 10 گیٹس بھی تیار ہیں۔ انہیں جلد چین سے پاکستان منتقل کیا جائے گا۔ ہر گیٹ کا وزن 50 ٹن سے زیادہ ہے۔
نہری گیٹس کی تبدیلی کا کام بھی جاری
وزیر آبپاشی جام خان شورو نے بتایا کہ سکھر بیراج کی نہروں کے 110 گیٹس بھی تبدیل کیے جارہے ہیں۔ چینی کمپنی ان گیٹس کی تیاری پر کام کررہی ہے۔
حکام کے مطابق 2026 میں بیراج کی بندش کے دوران 27 نہری گیٹس کے سول ورکس اور اندرونی حصوں کی مرمت مکمل کی گئی۔ پانی کی سطح ناپنے کے لیے چھ گیج ویلز بھی تعمیر کرکے متعلقہ حکام کے حوالے کردی گئیں۔
ڈریجنگ اور کھدائی کا بیشتر کام مکمل
مراد علی شاہ کو بتایا گیا کہ سکھر بیراج کے مختلف حصوں میں ڈریجنگ اور کھدائی مکمل ہوچکی ہے۔ تاہم ٹیل چینل میں کام باقی ہے، جو اگلے ورکنگ سیزن میں کیا جائے گا۔
گیٹس کی تیاری کے لیے قائم فیبریکیشن ورکشاپ کی عمارت بھی مکمل ہوچکی ہے۔
وزیراعلیٰ سندھ نے کہا کہ سکھر بیراج صوبے کی معاشی اور زرعی ترقی کے لیے انتہائی اہم ہے۔ ان کے مطابق تقریباً 90 سال بعد بیراج کی باقاعدہ بحالی سے پانی کے بہاؤ میں نمایاں بہتری آئی ہے۔
منصوبہ جون 2027 تک مکمل کرنے کا ہدف
سکھر بیراج کی بحالی کا منصوبہ 24 فروری 2023 کو شروع کیا گیا تھا۔ اسے 30 جون 2027 تک مکمل کرنے کا ہدف مقرر کیا گیا ہے۔
حکام کے مطابق اس منصوبے پر چائنا روڈ اینڈ برج کارپوریشن (سی آر بی سی) اور ایچ بی ایس زیڈ مشترکہ طور پر کام کررہے ہیں۔ عالمی بینک، وفاقی حکومت اور سندھ حکومت اس منصوبے کی مالی معاونت کررہے ہیں۔
سندھ بیراجز امپرومینٹ پروجیکٹ کے تحت سکھر اور گڈو بیراج کی بحالی کا کام بھی جاری ہے۔ اس منصوبے کے پانچ اجزا میں سکھر اور گڈو بیراج کی بحالی بھی شامل ہے۔
مراد علی شاہ نے کہا کہ سندھ حکومت سکھر بیراج کی بحالی مقررہ مدت میں مکمل کرنے کے لیے پرعزم ہے۔ انہوں نے پاکستان اور چین کے درمیان آبی بنیادی ڈھانچے میں تعاون مزید مضبوط بنانے کی ضرورت پر بھی زور دیا۔
