کراچی: وزیراعلیٰ سندھ سید مراد علی شاہ نے کراچی کو پانی فراہم کرنے والے کے فور منصوبے کی 100 کلومیٹر طویل پائپ لائن پر جلد کام شروع کرنے کی ہدایت کردی۔ حکام کے مطابق چینی کمپنی ایچ بی ایس زیڈ نے منصوبے کی تعمیر پر آمادگی ظاہر کی ہے۔
مراد علی شاہ نے چین کے شہر ووہان کے علاقے ہانیانگ میں ایچ بی ایس زیڈ کمپنی کا دورہ کیا۔ اس موقع پر کے فور پائپ لائن منصوبے اور سکھر بیراج کی بحالی کے امور پر تبادلہ خیال کیا گیا۔
کے فور پائپ لائن پر پیش رفت
حکام کے مطابق چینی کمپنی نے 100 کلومیٹر طویل پائپ لائن کی تعمیر میں دلچسپی ظاہر کی ہے۔ وزیراعلیٰ سندھ نے متعلقہ حکام کو منصوبے پر جلد عملی پیش رفت یقینی بنانے کی ہدایت کی۔
سکھر بیراج کے 44 دروازے فعال
دورے کے دوران وزیراعلیٰ سندھ نے سکھر بیراج کی بحالی اور جدید کاری کے لیے تیار کیے گئے دروازوں کا بھی معائنہ کیا۔
حکام نے بریفنگ میں بتایا کہ دریائی پانی کے بہاؤ کو کنٹرول کرنے والے 54 دروازوں میں سے 44 اور ان کے آپریٹنگ سسٹم تبدیل کرکے فعال کردیے گئے ہیں۔ متعلقہ مقامات پر تعمیراتی مرمت بھی مکمل ہوچکی ہے۔
بریفنگ کے مطابق باقی 10 دروازے تیار ہیں اور انہیں جلد چین سے پاکستان منتقل کیا جائے گا۔ چینی حکام کے مطابق ہر دروازے کا وزن 50 ٹن سے زیادہ ہے۔
ایچ بی ایس زیڈ سکھر بیراج کے لیے 110 نہری دروازے بھی تیار کررہی ہے۔ حکام کے مطابق 2026 میں بیراج کی بندش کے دوران 27 نہری دروازوں کے سول ورکس اور اندرونی حصوں کی مرمت مکمل کی گئی۔ پانی کی سطح ناپنے کے لیے چھ گیج ویلز بھی تعمیر کرکے متعلقہ حکام کے حوالے کردی گئیں۔
سندھ میں چینی سرمایہ کاری: شرجیل میمن کو نئی صنعتوں اور روزگار کے مواقع کی امید
بیراج کی بحالی کا کام جاری
حکام نے بتایا کہ بیراج کے مختلف حصوں میں ڈریجنگ اور کھدائی مکمل ہوچکی ہے، تاہم ٹیل چینل میں کام باقی ہے۔ یہ کام اگلے ورکنگ سیزن میں کیا جائے گا۔ دروازے تیار کرنے والی ورکشاپ کی عمارت بھی مکمل کرلی گئی ہے۔
مراد علی شاہ نے کہا کہ سکھر بیراج سندھ کی معیشت اور زرعی نظام کے لیے انتہائی اہم ہے۔ ان کے مطابق تقریباً 90 سال بعد بیراج کی باقاعدہ بحالی سے پانی کے بہاؤ میں نمایاں بہتری آئی ہے۔
منصوبہ جون 2027 تک مکمل کرنے کا ہدف
سکھر بیراج کی بحالی کا منصوبہ 24 فروری 2023 کو شروع ہوا تھا۔ حکام نے اسے 30 جون 2027 تک مکمل کرنے کا ہدف مقرر کیا ہے۔
منصوبے کے لیے عالمی بینک، وفاقی حکومت اور سندھ حکومت مالی معاونت فراہم کررہے ہیں۔ سندھ بیراجز امپرومینٹ پروجیکٹ کے تحت گڈو بیراج کی بحالی کا کام بھی جاری ہے۔
چینی کمپنیوں کو سرمایہ کاری کی دعوت
وزیراعلیٰ سندھ نے چینی کمپنیوں کو صوبے میں آبی وسائل، زراعت اور بنیادی ڈھانچے کے شعبوں میں سرمایہ کاری کی دعوت دی۔
انہوں نے موسمیاتی تبدیلیوں کے اثرات کا مقابلہ کرنے والی فصلوں کی اقسام تیار کرنے کے لیے بھی تعاون کی خواہش ظاہر کی۔
