تہران: ایران نے خبردار کیا ہے کہ اگر جنگ دوبارہ شروع ہوئی تو جوابی کارروائیوں میں مشرق وسطیٰ میں موجود امریکی جنگی جہازوں کو نشانہ بنانے کی کوشش بھی شامل ہوسکتی ہے۔
امریکی اخبار وال اسٹریٹ جرنل کے مطابق ایران نے ممکنہ امریکی حملے کے پیش نظر اہم تنصیبات اور حساس مقامات کی سکیورٹی سخت کرنا شروع کردی ہے۔ سرحدی علاقوں میں بھی حفاظتی اقدامات بڑھائے جارہے ہیں۔
حساس مقامات پر حفاظتی انتظامات
رپورٹ کے مطابق ایران نے گزشتہ ماہ جبل الفأس اور نطنز کے مقامات کے اطراف مٹی کے حفاظتی بند تعمیر کیے۔ ان اقدامات کا مقصد ممکنہ امریکی فوجی پیش قدمی کو روکنا بتایا گیا ہے۔
زیادہ جارحانہ کارروائیوں کا عندیہ
وال اسٹریٹ جرنل نے ایک ایرانی عہدیدار کے حوالے سے بتایا کہ تنازع دوبارہ شروع ہونے کی صورت میں ایران خطے میں موجود اہداف کو نشانہ بنا سکتا ہے۔
اخبار کے مطابق تہران نے ثالثوں کو بھی آگاہ کیا ہے کہ جنگ دوبارہ شروع ہوئی تو جوابی کارروائیاں زیادہ جارحانہ ہوسکتی ہیں۔ ان میں مشرق وسطیٰ میں امریکی جنگی جہازوں کو ڈبونے کی کوشش بھی شامل ہوسکتی ہے۔
