کراچی: گڈاپ سٹی پولیس نے خفیہ اطلاع پر کارروائی کرتے ہوئے منشیات کی ترسیل میں ملوث ہونے کے شبہے میں دو ملزمان کو گرفتار کرلیا۔
ترجمان ضلع ملیر پولیس کے مطابق ملزمان جوتوں کے سول میں چرس چھپا کر کراچی منتقل کرتے تھے۔ پولیس نے کارروائی کے دوران 2 کلو گرام چرس برآمد کرنے کا دعویٰ کیا ہے۔
گرفتار ملزمان کی شناخت
پولیس کے مطابق گرفتار ملزمان کی شناخت کامران لانگھا ولد غلام حسین اور ثاقب بروہی ولد حاجی بشیر کے نام سے ہوئی۔
ترجمان کے مطابق ملزمان بلوچستان کے علاقے حب چوکی سے جوتوں کے سول میں چرس چھپا کر کراچی لاتے تھے۔ بعد ازاں اسے شہر کے مختلف علاقوں میں فروخت کے لیے منتقل کیا جاتا تھا۔
مقدمہ درج، مزید تفتیش جاری
گڈاپ سٹی پولیس نے دونوں ملزمان کے خلاف مقدمہ درج کرکے قانونی کارروائی شروع کردی ہے۔
پولیس کے مطابق ملزمان کے سابقہ ریکارڈ اور منشیات کی ترسیل کے نیٹ ورک سے متعلق مزید تفتیش جاری ہے۔
