چیف سیکریٹری سندھ آصف حیدر شاہ کی زیر صدارت اجلاس میں یاسمین لاری نے مجوزہ ماڈل پیش کیا، منصوبے میں تاریخی ورثے کے تحفظ اور شہری سہولیات کی بہتری پر توجہ دی جائے گی۔
کراچی: کراچی کی تاریخی برنس روڈ کو خوبصورت اور پیدل چلنے والوں کے لیے سازگار بنانے کا منصوبہ تیار کرلیا گیا۔ اس منصوبے میں علاقے کی روایتی شناخت اور ثقافتی ورثے کو برقرار رکھنے کی تجویز دی گئی ہے۔
چیف سیکریٹری سندھ آصف حیدر شاہ کی زیر صدارت اجلاس میں معروف ماہرِ تعمیرات یاسمین لاری نے مجوزہ ماڈل پیش کیا۔
آصف حیدر شاہ نے کہا کہ برنس روڈ کی تاریخی اہمیت برقرار رکھتے ہوئے عوامی سہولیات بہتر بنائی جائیں گی۔ منصوبے کا مقصد شہریوں اور کاروباری افراد کو بہتر ماحول فراہم کرنا ہے۔
انہوں نے کہا کہ برنس روڈ کو پیدل دوست بنانے سے شہریوں کی آمدورفت آسان ہوگی۔ اس سے فوڈ اسٹریٹ کا ماحول بھی بہتر بنانے میں مدد ملے گی۔
چیف سیکریٹری سندھ کے مطابق منصوبے میں مقامی رہائشیوں اور کاروباری برادری کو بھی اعتماد میں لیا گیا ہے۔ بحالی کے دوران برنس روڈ کی تاریخی حیثیت اور روایتی ماحول کو برقرار رکھا جائے گا۔
آصف حیدر شاہ نے بتایا کہ میئر کراچی اور متعلقہ میونسپل ٹاؤن انتظامیہ بھی مجوزہ منصوبے سے متفق ہیں۔ منصوبے میں تاریخی ورثے کے تحفظ اور شہری سہولیات کی بہتری کو اہمیت دی گئی ہے۔
