کراچی: آئی ایس پی آر کے مطابق پاکستان نیوی کے جہاز یرموک (YARMOOK) نے بحیرہ عرب میں تعیناتی کے دوران پاکستانی ساحل سے دور دو کامیاب انسداد منشیات کارروائیاں کیں۔
پاک فوج کے شعبہ تعلقات عامہ کے مطابق کارروائیوں کے دوران دو دھاؤں کو روکا گیا۔ ان کے اندر بنائے گئے خفیہ خانوں سے تقریباً 850 کلوگرام آئس اور 2 ہزار کلوگرام چرس و بھنگ برآمد کی گئی۔
منشیات کی مالیت 96 ملین ڈالر
آئی ایس پی آر کے مطابق ضبط کی گئی منشیات کی مجموعی مالیت تقریباً 96 ملین امریکی ڈالر بتائی گئی ہے۔
ضبط شدہ منشیات کو تحویل میں لے لیا گیا ہے۔ انہیں مزید تلفی اور قانونی کارروائی کے لیے متعلقہ حکام کے حوالے کیا جائے گا۔
سمندری نگرانی اور سکیورٹی
آئی ایس پی آر کے مطابق پاکستان نیوی کی یہ کارروائیاں مسلسل سمندری موجودگی اور چوکسی کا مظہر ہیں۔
پاک فوج کے شعبہ تعلقات عامہ کا کہنا ہے کہ کارروائیاں علاقائی بحری سلامتی کے تحفظ اور سمندر میں غیر قانونی منشیات کی اسمگلنگ کے خلاف پاکستان نیوی کے عزم کو ظاہر کرتی ہیں۔
