کراچی میں بھتہ خوری اور فائرنگ پر ایم کیو ایم کا اظہار تشویش

کراچی: ایم کیو ایم پاکستان کی مرکزی کمیٹی نے کراچی میں گزشتہ 15 روز کے دوران بھتہ خوری اور فائرنگ کے واقعات میں اضافے پر تشویش کا اظہار کیا ہے۔

مرکزی کمیٹی نے اپنے بیان میں کہا کہ تاجروں کو تحفظ فراہم کرنے میں سندھ حکومت اور قانون نافذ کرنے والے ادارے مؤثر اقدامات نہیں کر رہے۔

ایم کیو ایم پاکستان کے مطابق پاک کالونی ماربل مارکیٹ میں کاروبار کی بندش اور تاجروں کا احتجاج شہر میں تاجروں کے تحفظ سے متعلق خدشات کی عکاسی کرتا ہے۔

تاجروں کو سیکیورٹی فراہم کرنے کا مطالبہ

ایم کیو ایم پاکستان نے کہا کہ تاجروں کے جان و مال کے تحفظ کے لیے مؤثر سیکیورٹی اقدامات ضروری ہیں۔

مرکزی کمیٹی کے مطابق شہر کے تجارتی مراکز میں بھتہ خور عناصر کے خلاف بلاامتیاز کارروائی کی ضرورت ہے۔

بیان میں کہا گیا کہ صرف 15 روز کے دوران بھتہ خوری اور فائرنگ کے متعدد واقعات انتظامی کارکردگی پر سوالات اٹھاتے ہیں۔

ایس ایس پی سینٹرل کا ناکہ بندی و چیکنگ پوائنٹس کا دورہ

بھتہ مافیا کے خلاف کارروائی کا مطالبہ

ایم کیو ایم پاکستان نے وزیراعلیٰ سندھ، پولیس حکام اور متعلقہ اداروں سے مطالبہ کیا کہ پاک کالونی ماربل مارکیٹ سمیت کراچی کے تمام کاروباری مراکز میں تاجروں کو فول پروف سیکیورٹی فراہم کی جائے۔

مرکزی کمیٹی نے بھتہ خور عناصر کے خلاف فوری کارروائی اور تاجروں کو خوف و عدم تحفظ سے نجات دلانے کا بھی مطالبہ کیا۔

ایم کیو ایم پاکستان نے کہا کہ وہ تاجر برادری کے جائز مطالبات اور تحفظ کے حق کی حمایت جاری رکھے گی۔