سولجر بازار میں سیکیورٹی گارڈ کی فائرنگ سے ایک مبینہ ملزم ہلاک ہوگیا۔
پولیس نے واقعے کی مختلف سی سی ٹی وی فوٹیجز حاصل کرلی ہیں۔ فوٹیجز میں مشتبہ افراد کو موٹرسائیکلوں پر دیکھا جاسکتا ہے۔
خاتون نے دکان میں پناہ لی
ایک سی سی ٹی وی فوٹیج میں خاتون کو بچی کے ہمراہ دکان کی جانب جاتے دیکھا گیا۔
خاتون مبینہ مسلح افراد کو دیکھ کر دکان میں داخل ہوگئی۔
دکان کے باہر موجود سیکیورٹی گارڈ بھی صورتحال دیکھ کر الرٹ ہوگیا۔
فوٹیج میں ایک مشتبہ شخص موٹرسائیکل سے اتر کر گارڈ کی جانب بڑھتا دکھائی دیتا ہے۔
اس دوران سیکیورٹی گارڈ نے فائرنگ کردی۔
رپیٹر گن چلانے کی کوشش
ایک اور فوٹیج میں دو موٹرسائیکلوں پر تین مشتبہ افراد دکانوں کے باہر رکتے دکھائی دیتے ہیں۔
ایک مشتبہ شخص کے ہاتھ میں رپیٹر گن بھی نظر آتی ہے۔
فوٹیج کے مطابق مشتبہ شخص نے رپیٹر گن چلانے کی کوشش کی، تاہم گن نہیں چلی۔
اسی دوران قریب موجود خاتون بچی کے ہمراہ دکان میں داخل ہوگئی۔
گارڈ نے صورتحال دیکھ کر مشتبہ افراد کی جانب فائرنگ کردی۔
فائرنگ سے ایک مشتبہ شخص ہلاک ہوگیا۔ اس کے ساتھی موقع سے فرار ہوگئے۔
پولیس کا ابتدائی مؤقف
ایس ایچ او سولجر بازار وقار عظیم کے مطابق ہلاک شخص اپنے ساتھیوں کے ہمراہ مبینہ واردات کی نیت سے آیا تھا۔
ان کے مطابق واقعے کے وقت لوگ ’ڈاکو، ڈاکو‘ کہہ رہے تھے۔
پولیس افسر کے مطابق بظاہر سیکیورٹی گارڈ نے اپنے دفاع میں فائرنگ کی۔
پولیس سی سی ٹی وی فوٹیجز اور دیگر شواہد کی مدد سے واقعے کی مزید تفتیش کررہی ہے۔
