اسلام آباد: پاک بحریہ نے بحیرہ عرب میں بڑی انسداد منشیات کارروائی کرتے ہوئے 2,800 کلوگرام سے زائد منشیات ضبط کرلیں۔
پاک بحریہ کے مطابق کارروائی میری ٹائم سیکیورٹی آپریشنز کے تحت کی گئی۔ آپریشن میں پی این ایس حنین اور پی این ایس یرموک نے حصہ لیا۔
مشکوک کشتی کی تلاشی
پاک بحریہ کے جہاز معمول کی گشت پر تھے۔ اس دوران ایک مشکوک کشتی کی نشاندہی ہوئی۔
جہازوں نے کشتی کو روکا اور بورڈنگ آپریشن کیا۔ تلاشی کے دوران کشتی میں بنائے گئے خفیہ خانوں کا بھی معائنہ کیا گیا۔
کارروائی کے دوران 2,800 کلوگرام سے زائد منشیات برآمد ہوئیں۔
پاک بحریہ کے مطابق ضبط کی گئی منشیات کی مالیت تقریباً 750 ملین امریکی ڈالر ہے۔
میری ٹائم سیکیورٹی کے لیے اہم کارروائی
پاک بحریہ کے مطابق کارروائی مسلسل نگرانی اور میری ٹائم سیکیورٹی کے عزم کی عکاس ہے۔
پاک بحریہ سمندر میں غیر قانونی اسمگلنگ کے خلاف کارروائیاں جاری رکھے ہوئے ہے۔
ادارے کے مطابق یہ اقدامات علاقائی میری ٹائم سیکیورٹی اور عالمی امن میں کردار ادا کرنے کے عزم کا حصہ ہیں۔
پاک بحریہ کے سربراہ کی اہلکاروں کو شاباش
پاک بحریہ کے سربراہ ایڈمرل نوید اشرف نے کامیاب کارروائی پر افسران اور عملے کو سراہا۔
انہوں نے پی این ایس حنین اور پی این ایس یرموک کے اہلکاروں کی پیشہ ورانہ مہارت اور مستعدی کی تعریف کی۔
ایڈمرل نوید اشرف نے کہا کہ پاک بحریہ قومی بحری مفادات کے تحفظ کے مشن پر قائم ہے۔
انہوں نے عالمی تجارتی راستوں کی سلامتی اور تحفظ میں کردار جاری رکھنے کے عزم کا بھی اعادہ کیا۔
