کراچی کے علاقے پاپوش نگر کی چاندنی چوک کچی آبادی میں گھر سے 19 سالہ خاتون کی لاش ملی۔ پولیس کے مطابق خاتون کی ہلاکت کی فوری وجہ معلوم نہیں ہوسکی۔
ایس ایچ او پاپوش نگر شوکت کے مطابق متوفیہ کی شناخت نازیہ زوجہ فرمان کے نام سے ہوئی ہے۔ نازیہ کی چند ماہ قبل شادی ہوئی تھی۔
پولیس نے لاش عباسی شہید اسپتال منتقل کردی۔ حکام کے مطابق خاتون کا پوسٹ مارٹم کیا جارہا ہے۔ رپورٹ آنے کے بعد موت کی وجہ واضح ہوسکے گی۔
شوہر نے پولیس کو کیا بتایا؟
پولیس کے مطابق نازیہ کے شوہر فرمان نے بیان دیا ہے۔ اس نے بتایا کہ دوپہر تقریباً ڈھائی سے 3 بجے اہلیہ کی فون کال آئی۔
فرمان کے مطابق نازیہ نے طبیعت خراب ہونے کی اطلاع دی۔ وہ تقریباً آدھے گھنٹے بعد گھر پہنچا تو اہلیہ کا انتقال ہوچکا تھا۔
پولیس کی مزید تحقیقات جاری
ایس ایچ او کے مطابق واقعے میں کچھ پراسرار پہلو موجود ہیں۔ نازیہ اپنی والدہ اور شوہر کے ساتھ گھر میں رہائش پذیر تھی۔
متوفیہ کی والدہ اور ماموں بھی اسپتال پہنچ گئے۔ پولیس نے واقعے سے متعلق مزید تحقیقات شروع کردی ہیں۔
