کراچی کے علاقے کھارادر میں قتل کیس میں ساؤتھ زون پولیس نے کارروائی کرتے ہوئے ایک ملزم کو گرفتار کرلیا۔
پولیس کے مطابق ملزم محمد فیصل شہری معین اختر کے قتل میں ملوث ہے۔ واردات کے دوسرے ملزم کی گرفتاری کے لیے کارروائی جاری ہے۔
کھارادر میں ڈکیتی کے دوران فائرنگ
پولیس کے مطابق 9 ستمبر کو معین اختر اپنے بیٹے کے ہمراہ کمپنی کا چیک کیش کرا کر واپس جا رہے تھے۔
اس دوران موٹر سائیکل سوار دو مسلح ملزمان نے ان سے نقد رقم چھیننے کی کوشش کی۔ مزاحمت پر ملزمان نے فائرنگ کردی۔
فائرنگ سے معین اختر شدید زخمی ہوگئے۔ بعدازاں وہ زخموں کی تاب نہ لاتے ہوئے جاں بحق ہوگئے۔
سی سی ٹی وی سے ملزمان کی شناخت
واقعے کا مقدمہ تھانہ ڈاکس میں درج کیا گیا۔ پولیس نے ملزمان کی گرفتاری کے لیے تفتیش شروع کی۔
پولیس کے مطابق تکنیکی شواہد اور سی سی ٹی وی فوٹیجز کی مدد سے ملزمان کی شناخت کی گئی۔
گرفتار ملزم محمد فیصل واردات سے قبل بینک کے اندر گیا تھا۔ پولیس کے مطابق اس نے شہری کی نقل و حرکت پر نظر رکھی۔
گرفتار ملزم سے اسلحہ اور رقم برآمد
پولیس کے مطابق بینک سے باہر آنے کے بعد محمد فیصل نے اپنے ساتھی شاہ فیصل سے موٹر سائیکل لی۔
محمد فیصل موٹر سائیکل چلا رہا تھا جبکہ شاہ فیصل پیچھے بیٹھا تھا۔ رقم چھیننے کے دوران مزاحمت پر شاہ فیصل نے شہری پر فائرنگ کی۔
واردات کے بعد دونوں ملزمان مختلف راستوں سے سعید آباد فرار ہوگئے۔
پولیس نے گرفتار ملزم کے قبضے سے 30 بور پستول، موٹر سائیکل اور چھینی گئی رقم میں سے 3 لاکھ روپے برآمد کرلیے۔
پولیس کا کہنا ہے کہ دونوں ملزمان مبینہ طور پر متعدد مقدمات میں گرفتار ہوکر جیل جا چکے ہیں۔
دوسرے ملزم شاہ فیصل کی گرفتاری کے لیے کارروائی جاری ہے۔ گرفتار ملزم سے مزید تفتیش بھی کی جا رہی ہے۔
