سکیورٹی فورسز کی آپریشن ردالفتنہ 3 کے تحت بلوچستان میں کارروائیاں جاری ہیں۔ سکیورٹی ذرائع کے مطابق دو کارروائیوں میں مزید 7 دہشت گرد ہلاک ہوگئے۔
پنجگور کے علاقے فتح علی میں سکیورٹی فورسز نے کارروائی کی۔ ذرائع کے مطابق فتنہ الہندوستان سے وابستہ 5 دہشت گرد مارے گئے۔
کارروائی کے دوران ہلاک دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا۔
کچھی میں انٹیلی جنس بیسڈ آپریشن
ضلع کچھی کے علاقے دھاڈر میں بھی سکیورٹی فورسز نے انٹیلی جنس بیسڈ آپریشن کیا۔ ذرائع کے مطابق کارروائی میں 2 دہشت گرد مارے گئے۔
ذرائع نے متعدد دیگر دہشت گردوں کے زخمی ہونے کی بھی اطلاع دی ہے۔
سکیورٹی فورسز بلوچستان میں دہشت گردی کے خاتمے اور امن و امان کے قیام کے لیے کارروائیاں جاری رکھے ہوئے ہیں۔
شمالی وزیرستان میں 6 خوارج ہلاک
دوسری جانب آئی ایس پی آر کے مطابق شمالی وزیرستان میں خوارج کی موجودگی کی اطلاع پر انٹیلی جنس بیسڈ آپریشن کیا گیا۔
فورسز نے خوارج کے ٹھکانے کو نشانہ بنایا۔ شدید فائرنگ کے تبادلے میں 6 خوارج ہلاک ہوئے۔
آئی ایس پی آر کے مطابق ہلاک افراد کے قبضے سے اسلحہ اور گولہ بارود بھی برآمد کیا گیا۔
ہنگو میں مزید 4 ہلاکتیں
آئی ایس پی آر کے مطابق ہنگو میں ایک اور جھڑپ کے دوران 4 خوارج ہلاک ہوئے۔
فورسز نے کارروائیوں کے بعد علاقے میں کلیئرنس آپریشن بھی شروع کیا۔ فوج کے مطابق کارروائیوں کا مقصد باقی موجود دہشت گردوں کی تلاش ہے۔
آئی ای ڈی حملے میں 6 جوان شہید
آئی ایس پی آر کے مطابق 17 ستمبر کو سکیورٹی فورسز کے قافلے کو آئی ای ڈی سے نشانہ بنایا گیا۔
دھماکے کے نتیجے میں 6 جوان شہید ہوگئے۔
فوج کے مطابق دہشت گردوں کے خلاف انسداد دہشت گردی کی کارروائیاں جاری رہیں گی۔
