چیف سیکریٹری سندھ آصف حیدر شاہ کی زیر صدارت سیکریٹریز کمیٹی کا اہم اجلاس ہوا۔
اجلاس میں تمام محکموں کے سیکریٹریز نے شرکت کی۔ ترقیاتی منصوبوں اور انتظامی امور کا جائزہ لیا گیا۔
فائر سیفٹی آڈٹ، پنشن کیسز اور افسران کی ترقیوں پر بھی غور ہوا۔ تادیبی کیسز اور ڈیجیٹل گورننس اصلاحات کا بھی جائزہ لیا گیا۔
آڈٹ پیراز نمٹانے کی ہدایت
آصف حیدر شاہ نے تمام محکموں کو ایک ماہ میں محکمانہ اکاؤنٹس کمیٹی کے اجلاس بلانے کی ہدایت کی۔
انہوں نے آڈٹ پیراز کو ترجیحی بنیاد پر نمٹانے پر زور دیا۔ پبلک اکاؤنٹس کمیٹی اور ڈی اے سی کے معاملات بھی جلد مکمل کرنے کی ہدایت کی۔
چیف سیکریٹری نے کہا کہ آڈٹ اعتراضات کا بروقت تصفیہ ضروری ہے۔ اس سے مالی نظم و ضبط اور شفافیت بہتر ہوتی ہے۔
ہزاروں افسران اور ملازمین کو ترقیاں
اجلاس کو محکمانہ پروموشن کمیٹیوں کی کارکردگی پر بریفنگ دی گئی۔
محکمہ داخلہ میں 58 ڈی پی سی اجلاس منعقد ہوئے۔ ان اجلاسوں کے ذریعے 3,306 افسران اور 4,558 ملازمین کو ترقی دی گئی۔
محکمہ سروسز میں 51 ڈی پی سی اجلاس ہوئے۔ ان کے ذریعے 1,987 افسران اور 139 ملازمین کو ترقی دی گئی۔
آصف حیدر شاہ نے تمام زیر التوا پروموشن کیسز جلد مکمل کرنے کی ہدایت کی۔
فائر سیفٹی آڈٹ میں 3,427 عمارتوں کی نشاندہی
اجلاس میں صوبے بھر میں فائر سیفٹی آڈٹ کی پیش رفت کا جائزہ لیا گیا۔
حکام کے مطابق فائر سیفٹی آڈٹ کے لیے 3,427 عمارتوں کی نشاندہی کی گئی۔
دوسرے مرحلے میں 947 عمارتوں کا دوبارہ معائنہ مکمل کیا گیا۔
ان میں سے 633 عمارتیں بڑی حد تک فائر سیفٹی تقاضوں پر پوری اترتی پائی گئیں۔
چیف سیکریٹری نے فائر سیفٹی اقدامات مزید مؤثر بنانے کی ہدایت کی۔ متعلقہ محکموں کے درمیان رابطہ مضبوط کرنے پر بھی زور دیا۔
پنشن کیسز کے لیے فیسلیٹیشن ڈیسک
آصف حیدر شاہ نے پنشن کیسز جلد مکمل کرنے کی ہدایت کی۔
انہوں نے کہا کہ ریٹائرڈ ملازمین کو بروقت سہولت فراہم کی جائے۔
چیف سیکریٹری نے تمام محکموں کو فیسلیٹیشن ڈیسک قائم کرنے کی ہدایت کی۔ یہ ڈیسک اے جی سندھ اور ضلعی ٹریژری دفاتر میں بھی قائم کیے جائیں گے۔
عدالتی احکامات پر عملدرآمد کی ہدایت
اجلاس میں سپریم کورٹ، سندھ ہائیکورٹ اور ماتحت عدالتوں کے احکامات کا جائزہ لیا گیا۔
چیف سیکریٹری نے بروقت جواب اور کمنٹس جمع کرانے کی ہدایت کی۔
انہوں نے کہا کہ عدالتی احکامات پر مکمل عملدرآمد یقینی بنایا جائے۔ مقدمات کی مؤثر قانونی پیروی بھی کی جائے۔
جاب پورٹل سے بھرتیوں میں شفافیت
اجلاس میں گریڈ 5 سے 15 تک بھرتیوں کی پیش رفت بھی دیکھی گئی۔
حکام نے سندھ جاب پورٹل کے ذریعے بھرتیوں پر بریفنگ دی۔
آصف حیدر شاہ نے کہا کہ جاب پورٹل نے بھرتی کا عمل تیز اور شفاف بنایا ہے۔
انہوں نے ڈیجیٹل گورننس کو مزید مؤثر بنانے کی ہدایت کی۔ سرکاری نظام کو شفاف، تیز اور عوام دوست بنانے پر زور دیا۔
چیف سیکریٹری سندھ نے انتظامی امور، آڈٹ، پنشن اور ترقیوں پر پیش رفت تیز کرنے کی ہدایت بھی کی۔
