منشیات کے خلاف اینٹی نارکوٹکس فورس (اے این ایف) نے ملک کے مختلف شہروں میں کارروائیاں کیں۔ ترجمان اے این ایف کے مطابق 11 کارروائیوں کے دوران 12 ملزمان گرفتار ہوئے۔
ترجمان کے مطابق کارروائیوں میں مجموعی طور پر 110.686 کلوگرام منشیات برآمد کی گئی۔ برآمد شدہ منشیات کی مالیت 2 کروڑ 89 لاکھ روپے سے زائد بتائی گئی ہے۔
اسلام آباد ایئرپورٹ پر منشیات برآمد
اے این ایف کے مطابق اسلام آباد ایئرپورٹ پر جدہ جانے والے مسافر کے بیگ سے 906 گرام آئس برآمد ہوئی۔
ایک اور کارروائی میں اٹلی جانے والے مسافر کے پیٹ سے 55 ہیروئن بھرے کیپسول برآمد ہوئے۔ ان کا مجموعی وزن 440 گرام بتایا گیا ہے۔
جدہ جانے والے ایک اور مسافر کے پیٹ سے 16 کوکین بھرے کیپسول بھی برآمد کیے گئے۔ ترجمان کے مطابق ان کا مجموعی وزن 96 گرام تھا۔
کراچی میں کورئیر پارسلز سے آئس برآمد
ترجمان اے این ایف کے مطابق کراچی صدر کے قریب ایک کورئیر آفس میں آسٹریلیا جانے والے پارسل کی تلاشی لی گئی۔
کارروائی کے دوران کپڑوں میں جذب کی گئی 3.5 کلوگرام آئس برآمد ہوئی۔
شاہراہ فیصل کے قریب بھی ایک کورئیر آفس میں کارروائی ہوئی۔ پارسل سے 5.7 کلوگرام آئس برآمد کی گئی۔ کارروائی میں ایک ملزم گرفتار ہوا۔
پشاور اور گلگت میں کارروائیاں
ناصر باغ روڈ پشاور کے قریب ایک گاڑی سے 55.5 کلوگرام افیون برآمد ہوئی۔ کارروائی میں 2 ملزمان گرفتار ہوئے۔
وارسک روڈ پشاور بس ٹرمینل کے قریب بھی گاڑی کی تلاشی لی گئی۔ اس سے 18 کلوگرام چرس برآمد ہوئی۔ 2 ملزمان کو گرفتار کیا گیا۔
سٹی پارک گلگت کے قریب گاڑی سے 9.6 کلوگرام چرس برآمد ہوئی۔ کارروائی میں 2 ملزمان گرفتار ہوئے۔
کراچی اور راولپنڈی میں بھی کارروائیاں
سہراب گوٹھ بس ٹرمینل کے قریب رکشے سے 9.6 کلوگرام چرس برآمد ہوئی۔ کارروائی میں ایک ملزم گرفتار کیا گیا۔
حب ریور روڈ کراچی کے قریب بس ٹرمینل پر ایک مشکوک بیگ سے 6.4 کلوگرام ویڈ برآمد ہوئی۔
جی ٹی روڈ راولپنڈی کے قریب موٹر سائیکل سوار سے 80 گرام ویڈ برآمد کی گئی۔
اے این ایف کے مطابق تمام کارروائیوں کے بعد انسداد منشیات ایکٹ 1997 کے تحت مقدمات درج کرلیے گئے ہیں۔ مزید تحقیقات جاری ہیں۔
