ڈکیتی اور اسٹریٹ کرائم کی متعدد وارداتوں میں ملوث مبینہ شیرو گروہ کے ایک ملزم کو سندھ رینجرز نے گرفتار کرلیا۔ رینجرز کے مطابق کارروائی خفیہ معلومات کی بنیاد پر لالاباد، شیر پاؤ کالونی میں کی گئی۔
ترجمان سندھ رینجرز کے مطابق گرفتار ملزم کی شناخت ارسلان شاہ ولد عبدالصمد کے نام سے ہوئی ہے۔
اسلحہ اور موٹرسائیکل برآمد
رینجرز کے مطابق ملزم کے قبضے سے ایک موبائل فون اور بغیر کاغذات 125 موٹرسائیکل برآمد ہوئی۔
کارروائی کے دوران ملزم کے ساتھی کے گھر سے 30 بور پستول بھی برآمد کیا گیا۔ پستول کے ساتھ ایمونیشن موجود تھا اور اس کا لائسنس بھی نہیں تھا۔
متعدد وارداتوں میں ملوث ہونے کا دعویٰ
رینجرز کے مطابق ملزم اپنے ساتھیوں کے ساتھ شیر پاؤ کالونی، داؤد چورنگی، ملیر، قیوم آباد، کورنگی اور ملحقہ علاقوں میں وارداتیں کرتا تھا۔
حکام کا کہنا ہے کہ گروہ اسلحے کے زور پر نقدی، موبائل فونز اور موٹرسائیکلیں چھینتا تھا۔ ڈکیتی میں مزاحمت کرنے والے افراد کو زخمی کرنے کی وارداتوں میں بھی گروہ ملوث رہا ہے۔
رینجرز کے مطابق ملزم چھینی گئی موٹرسائیکلیں شیر پاؤ کالونی میں فروخت کرتا تھا۔ موبائل فونز قائدآباد میں فروخت کیے جاتے تھے۔
دیگر ملزمان کی گرفتاری کے لیے کوششیں جاری
ترجمان کے مطابق ارسلان شاہ کے خلاف مختلف تھانوں میں متعدد ایف آئی آرز درج ہیں۔ وہ اس سے قبل بھی پولیس کے ہاتھوں گرفتار ہوکر جیل جا چکا ہے۔
رینجرز نے ملزم کو برآمد شدہ سامان سمیت مزید قانونی کارروائی کے لیے پولیس کے حوالے کردیا ہے۔ گروہ کے دیگر ساتھیوں کی گرفتاری کے لیے کوششیں جاری ہیں۔
ترجمان سندھ رینجرز نے شہریوں سے جرائم پیشہ عناصر کی اطلاع دینے کی اپیل بھی کی ہے۔ شہری قریبی رینجرز چیک پوسٹ، ہیلپ لائن 1101 یا مددگار واٹس ایپ نمبر پر اطلاع دے سکتے ہیں۔
