کراچی: معروف اطالوی لگژری برانڈ ڈولچے اینڈ گبانا نے اپنی نئی خوشبو یور ڈیووشن ایو ڈی پرفیوم اِنٹنس کراچی میں متعارف کرا دی ہے۔ خوشبو کی رونمائی اٹلی کے قونصل خانے کی سرپرستی میں ایلی گانز لگژری اور ملک کے اشتراک سے ڈولمین مال کراچی میں منعقدہ خصوصی تقریب کے دوران ہوئی۔
تقریب میں اطالوی نفاست، اعلیٰ معیار کی دستکاری اور بحیرۂ روم کی ثقافتی روایات کو کراچی کے متحرک فیشن اور ثقافتی ماحول کے ساتھ پیش کیا گیا۔
نئی خوشبو میں سسلی کے خربوزے اور مینڈارن کے خوشبودار نوٹس کے ساتھ نارنجی کے پھول، ونیلا ملک اور صندل کی لکڑی کی مہک شامل ہے۔ برانڈ کے مطابق خوشبو جذبے، گرمجوشی، رومانویت اور جدید عیش و عشرت کے احساس کو نمایاں کرتی ہے۔
تقریب سے خطاب کرتے ہوئے کراچی میں اٹلی کے قونصل فابریزیو بیئیلی نے کہا کہ کراچی ثقافت کا ایک اہم مرکز ہے، جہاں فن، فیشن اور معیاری مصنوعات میں لوگوں کی گہری دلچسپی ہے۔
انہوں نے کہا کہ نئی خوشبو اٹلی اور پاکستان کی ثقافتوں کے درمیان ایک خوبصورت رابطے کی علامت ہے، جو بحیرۂ روم کی گرمجوشی کو پاکستان کی نفاست کے ساتھ جوڑتی ہے۔
فابریزیو بیئیلی نے اطالوی لگژری مصنوعات کو کراچی تک پہنچانے اور خوشبو کی رونمائی کے لیے تقریب منعقد کرنے پر ایلی گانز لگژری اور ریٹیل پارٹنر ملک کا بھی شکریہ ادا کیا۔
یور ڈیووشن ایو ڈی پرفیوم اِنٹنس کی کراچی میں رونمائی کو پاکستان میں خوشبوؤں کے شوقین افراد کے لیے اطالوی لگژری اور جدید خوشبوؤں کے تجربے میں ایک نیا اضافہ قرار دیا جا رہا ہے۔
