کراچی میں اسپیشل انویسٹی گیشن یونٹ (ایس آئی یو) سی آئی اے نے کارروائی کرتے ہوئے بھتہ خوری میں ملوث صمد کاٹھیاواڑی گروہ کے ایک اہم کارندے کو گرفتار کرلیا۔ ایس ایس پی ایس آئی یو سمیع اللہ سومرو کے مطابق گرفتار ملزم کی شناخت سید اسامہ علی کے نام سے ہوئی ہے اور اس کے قبضے سے ایک ہینڈ گرینیڈ برآمد ہوا ہے۔
پولیس کے مطابق ملزم بدنام صمد کاٹھیاواڑی گروہ کی ہدایت پر مختلف اہداف کی ویڈیوز بناتا اور یہ ویڈیوز گینگ کمانڈرز کو بھیجتا تھا۔ کمانڈرز کی ہدایت ملنے کے بعد وہ مختلف کارروائیوں میں بھی حصہ لیتا تھا۔
ایس ایس پی سمیع اللہ سومرو کے مطابق تفتیش کے دوران گوجابا سویٹس اور مرفانی ٹریولز پر فائرنگ کے واقعات میں بھی ملزم کی سہولت کاری کا انکشاف ہوا ہے۔
پولیس نے گرفتار ملزم کے خلاف ایس آئی یو تھانے میں مقدمہ درج کرلیا ہے، جبکہ گینگ سے وابستگی اور دیگر وارداتوں سے متعلق مزید تفتیش جاری ہے۔
