سندھ پولیس نے لانڈھی میں مضرِ صحت گٹکا اور ماوا بنانے والے کارخانے پر کارروائی کی۔ پولیس نے 2 ملزمان کو گرفتار کرکے بڑی مقدار میں سامان برآمد کرلیا۔
پولیس کے مطابق کارروائی تھانہ لانڈھی کی حدود میں برمی کالونی کے علاقے میں کی گئی۔ اہلکاروں نے مکان نمبر 150 میں قائم مبینہ کارخانے پر چھاپہ مارا۔
گرفتار ملزمان کی شناخت عبدالرحیم اور عنایت اللہ کے نام سے ہوئی ہے۔ پولیس نے ان کے قبضے سے 27 پڑیاں مضرِ صحت ماوا برآمد کیا۔
کارروائی کے دوران تقریباً 13 سے 14 کلو گیلی چھالیہ بھی ملی۔ پولیس نے ایک مکسچر مشین اور مختلف اقسام کی پتی کے پیکٹ بھی قبضے میں لیے۔
پولیس نے ایک بوتل خوشبو کیمیکل، سفید چونے کے 2 شاپر اور تقریباً 4 سے 5 کلو کہلی پتی بھی برآمد کی۔ اس کے علاوہ پلاسٹک کے ٹب، بلو ڈرم اور ڈیجیٹل کانٹے بھی قبضے میں لیے گئے۔
پولیس کے مطابق ملزمان کے خلاف گٹکا و ماوا ایکٹ 2019 کے تحت مقدمہ درج کرلیا گیا ہے۔ مقدمہ تھانہ لانڈھی میں ایف آئی آر نمبر 480/2026 کے تحت درج ہوا۔
پولیس نے بتایا کہ واقعے کی مزید تفتیش جاری ہے۔
