ایران کے خلاف امریکا نے نئی اور سخت اقتصادی کارروائی شروع کرنے کا اعلان کیا ہے۔ امریکی وزیر خزانہ اسکاٹ بیسنٹ نے اسے ’اقتصادی ڈی ڈے‘ قرار دیا ہے۔
اسکاٹ بیسنٹ نے کہا کہ صدر ڈونلڈ ٹرمپ نے ایران کی فوجی صلاحیتوں کو شدید نقصان پہنچایا ہے۔ ان کے مطابق ایرانی فوجی فیکٹریوں کی تقریباً 100 فیصد تباہی کا دعویٰ بھی کیا گیا ہے۔
امریکی وزیر خزانہ نے کہا کہ واشنگٹن اب ایران کو مزید معاشی طور پر تنہا کرنے کی کوشش کرے گا۔ ان کے مطابق امریکا ایران کی حکومت کو ملنے والے معاشی وسائل اور ذرائع کو نشانہ بنائے گا۔
بیسنٹ نے اس کارروائی کو کسی مخالف کے خلاف امریکا کی اب تک کی سب سے بڑی مالی مہم قرار دیا۔ انہوں نے کہا کہ واشنگٹن ایران کی معاشی زندگی کی تمام اہم کڑیاں کاٹنے کا ارادہ رکھتا ہے۔
انہوں نے مزید کہا کہ ایران کا جوہری پروگرام بھی شدید متاثر ہوا ہے۔ بیسنٹ کے مطابق امریکا اب تنازع کے ’فیصلہ کن مرحلے‘ میں داخل ہو رہا ہے۔
دوسری جانب ایران نے امریکی اقتصادی دباؤ کو مسترد کردیا ہے۔ ایرانی نائب وزیر خارجہ کاظم غریب آبادی نے امریکی دعووں پر سوال اٹھاتے ہوئے کہا کہ اگر ایران کی فوجی اور جوہری صلاحیتیں واقعی ختم ہوچکی ہیں تو اتنی بڑی مالی کارروائی کی ضرورت کیوں پیش آرہی ہے۔
امریکا کی نئی پابندیوں کے اعلان سے خطے میں پہلے سے جاری کشیدگی مزید بڑھنے کا خدشہ ہے۔ واشنگٹن آج نئی پابندیوں کی تفصیلات بھی سامنے لانے والا ہے۔
