ڈیولوشن کے مطالبے پر سندھ حکومت کی ترجمان سعدیہ جاوید نے مصطفیٰ کمال کو تنقید کا نشانہ بنایا ہے۔ انہوں نے کہا کہ صوبائی نوعیت کی وزارت سنبھال کر اختیارات کی منتقلی کا نعرہ لگانا تضاد ہے۔
سعدیہ جاوید نے کہا کہ ڈیولوشن کی بات کرنے والوں کو پہلے اپنی وزارت کا جائزہ لینا چاہیے۔ ان کے مطابق صوبائی محکمے میں بیٹھ کر اختیارات کی منتقلی کا مطالبہ مذاق بن جاتا ہے۔
ترجمان سندھ حکومت نے کہا کہ مصطفیٰ کمال کا مؤقف واضح تضاد ظاہر کرتا ہے۔ انہوں نے وفاق سے مطالبہ کیا کہ وہ سندھ کے ساتھ اپنے رویے اور وعدوں کا بھی حساب دے۔
حیدرآباد، سکھر موٹروے پر وفاق کو تنقید
سعدیہ جاوید نے حیدرآباد، سکھر موٹروے کی تاخیر پر بھی وفاق کو تنقید کا نشانہ بنایا۔ ان کا کہنا تھا کہ یہ منصوبہ کئی برس سے التوا کا شکار ہے، جبکہ وفاقی ترجیحات میں سندھ اب بھی نظرانداز ہو رہا ہے۔
انہوں نے کہا کہ حیدرآباد، سکھر موٹروے مکمل کیے بغیر سیالکوٹ، لاہور موٹروے کے لیے نئی فنڈنگ کی جا رہی ہے۔ ان کے مطابق اس فیصلے سے وفاقی ترجیحات اور مبینہ دہرے معیار پر سوال اٹھتے ہیں۔
سعدیہ جاوید نے کہا کہ کراچی کی بندرگاہوں سے حیدرآباد اور سکھر تک زمینی رابطہ انتہائی اہم ہے۔ خراب انفرااسٹرکچر عوام، مسافروں اور کاروباری سرگرمیوں کے لیے مشکلات پیدا کر رہا ہے۔
سندھ کے منصوبوں کو ترجیح دینے کا مطالبہ
ترجمان سندھ حکومت نے کہا کہ ایک طرف ڈیولوشن کے نعرے لگائے جا رہے ہیں۔ دوسری طرف سندھ کے دیرینہ انفرااسٹرکچر منصوبوں کو مسلسل نظرانداز کیا جا رہا ہے۔
ان کے مطابق وفاق کا موجودہ طرزِ عمل سندھ میں احساسِ محرومی کو مزید بڑھا رہا ہے۔
