اینکریج سے کیپ نیونیہم جانے والا طیارہ منزل کے قریب حادثے کا شکار ہوا، حکام نے تحقیقات شروع کردیں۔
واشنگٹن: امریکی ریاست الاسکا میں چارٹر طیارہ حادثے کا شکار ہوگیا، جس میں سوار تمام 8 افراد ہلاک ہوگئے۔ طیارہ اینکریج سے کیپ نیونیہم جا رہا تھا اور منزل کے قریب گر کر تباہ ہوا۔
امریکی حکام کے مطابق حادثہ جمعرات کو کیپ نیونیہم کے قریب پیش آیا۔ طیارے میں دو پائلٹس اور چھ مسافر سوار تھے۔ الاسکا کمانڈ نے بھی تمام افراد کی ہلاکت کی تصدیق کردی ہے۔
حادثے کی تحقیقات شروع
فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) نے حادثے کی تحقیقات شروع کردی ہیں۔ حکام کے مطابق طیارہ کیپ نیونیہم کے قریب ایک دور افتادہ ریڈار سائٹ کے نزدیک گرا۔
ابتدائی معلومات کے مطابق طیارہ مقامی وقت کے مطابق تقریباً 12 بج کر 15 منٹ پر حادثے کا شکار ہوا۔ یہ طیارہ اینکریج سے تقریباً 450 میل دور واقع کیپ نیونیہم جا رہا تھا۔
حادثے کی فوری وجہ معلوم نہیں ہوسکی۔ NTSB تحقیقات کی قیادت کرے گا، جبکہ دیگر متعلقہ ادارے بھی کارروائی میں شامل ہیں۔
