کراچی میں ٹریفک پولیس کے ایک اہلکار کے خلاف شہریوں کو مبینہ طور پر ہراساں کرکے رقم طلب کرنے کی شکایت پر کارروائی کی گئی ہے۔
ڈی آئی جی ٹریفک پیر محمد شاہ نے سوشل میڈیا پر وائرل ویڈیو کا نوٹس لیا۔ ویڈیو میں ٹاور کے قریب ایک اہلکار کو شہریوں سے مبینہ طور پر رقم طلب کرتے دیکھا گیا۔
ڈی آئی جی کی ہدایت پر ایس ایس پی ٹریفک ڈسٹرکٹ سٹی نے فوری کارروائی کی۔ کھارادر ٹریفک سیکشن کے ریکارڈ کیپر محمد حنیف کو معطل کردیا گیا۔
پولیس کے مطابق معطل اہلکار کو لائن حاضر بھی کردیا گیا ہے۔ حکام نے واقعے کی مزید تحقیقات شروع کردی ہیں۔
ایس ایس پی ٹریفک نے ویڈیو میں نظر آنے والے سادہ لباس افراد کے خلاف مقدمہ درج کرنے کی بھی ہدایت کی ہے۔ پولیس کو واقعے کی مکمل تحقیقات کا حکم دیا گیا ہے۔
پولیس حکام کے مطابق تحقیقات کے بعد ذمہ دار افراد کے خلاف قانون کے مطابق کارروائی کی جائے گی۔
