کراچی میں انٹر نتائج 2026 کے تحت اعلیٰ ثانوی تعلیمی بورڈ کراچی نے بارہویں جماعت پری انجینئرنگ گروپ کے سالانہ امتحانات کے نتائج جاری کر دیے ہیں۔ چیئرمین انٹربورڈ کراچی فقیر محمد لاکھو نے نتائج کا اعلان کرتے ہوئے بتایا کہ اس بار پوزیشنز کے لیے طلبہ کے درمیان سخت مقابلہ رہا۔
پری انجینئرنگ گروپ میں پہلی پوزیشن تین امیدواروں نے مشترکہ طور پر حاصل کی، جبکہ تیسری پوزیشن پر دو امیدوار کامیاب رہے۔
پہلی پوزیشن آدمجی گورنمنٹ سائنس کالج کے محمد سعد عادل، اسی کالج کے عبداللہ جمال اور بحریہ کالج کارساز کی طالبہ عائشہ راشد نے مشترکہ طور پر حاصل کی۔ تینوں امیدواروں نے مجموعی 1100 میں سے 1006 نمبر حاصل کیے اور اے ون گریڈ حاصل کیا۔
دوسری پوزیشن آدمجی گورنمنٹ سائنس کالج کے محمد احمد رضا نے 1005 نمبروں کے ساتھ حاصل کی۔ انہوں نے بھی اے ون گریڈ حاصل کیا۔
تیسری پوزیشن دہلی گورنمنٹ کالج کے حافظ عبدالرافع طارق اور آدمجی گورنمنٹ سائنس کالج کے انس جاوید نے مشترکہ طور پر حاصل کی۔ دونوں امیدواروں نے 1004 نمبر حاصل کیے اور اے ون گریڈ کے حقدار قرار پائے۔
چیئرمین انٹربورڈ فقیر محمد لاکھو نے کہا کہ سرکاری کالجوں میں اعلیٰ تعلیمی معیار، قابل اساتذہ کی محنت اور طلبہ کی کوششوں کے باعث ان اداروں کے طلبہ ہر سال بورڈ امتحانات میں نمایاں کامیابیاں حاصل کر رہے ہیں۔ ان کے مطابق یہ سرکاری تعلیمی اداروں کے مضبوط تعلیمی نظام کا ثبوت ہے۔
انہوں نے خاص طور پر آدمجی گورنمنٹ سائنس کالج کی کارکردگی کو سراہا، جس کے چار طلبہ نے پری انجینئرنگ گروپ کی پہلی تین پوزیشنوں میں جگہ بنائی۔
کامیابی کا تناسب 55.08 فیصد
ناظم امتحانات زرینہ راشد کے مطابق پری انجینئرنگ گروپ کے امتحانات کے لیے 18,464 امیدواروں نے رجسٹریشن کرائی، جن میں سے 18,014 طلبہ امتحانات میں شریک ہوئے۔ مجموعی طور پر 9,922 امیدوار کامیاب قرار پائے اور کامیابی کا تناسب 55.08 فیصد رہا۔
نتائج کے مطابق 980 امیدواروں نے اے ون گریڈ، 1,781 نے اے گریڈ، 2,198 نے بی گریڈ، 2,659 نے سی گریڈ، 2,029 نے ڈی گریڈ اور 216 امیدواروں نے ای گریڈ حاصل کیا، جبکہ 59 امیدوار پاس قرار پائے۔
انٹربورڈ کراچی نے نتائج اپنی ویب سائٹ پر جاری کر دیے ہیں۔ امیدوار اپنا نتیجہ بورڈ کی آفیشل اینڈرائیڈ ایپ کے ذریعے بھی دیکھ سکتے ہیں۔ ایپ گوگل پلے اسٹور پر BIEK کے نام سے دستیاب ہے۔
