وفاقی وزیر بحری امور جنید انوار چوہدری کی زیر صدارت گارمنٹس سٹی کے قیام سے متعلق اجلاس ہوا، جس میں پورٹ قاسم میں 400 ایکڑ رقبے پر گارمنٹس سٹی قائم کرنے کے منصوبے کا اعلان کیا گیا۔
جنید انوار چوہدری نے بتایا کہ منصوبے کے پہلے مرحلے میں گارمنٹس سٹی کے لیے 250 ایکڑ رقبہ مختص کیا جائے گا۔ ان کے مطابق منصوبہ مکمل ہونے کے بعد ایک لاکھ 38 ہزار روزگار کے مواقع پیدا ہوں گے۔
وفاقی وزیر نے کہا کہ گارمنٹس سٹی سے سالانہ 2.2 ارب ڈالر کی برآمدات متوقع ہیں۔ حکومت نے منصوبے میں نجی سرمایہ کاری کو بنیادی اہمیت دی ہے تاکہ ٹیکسٹائل اور ملبوسات کے شعبے میں صنعتی سرگرمیوں کو فروغ دیا جا سکے۔
انہوں نے بتایا کہ گارمنٹس سٹی میں اعلیٰ قدر کی حامل ملبوسات تیار کی جائیں گی، جبکہ برآمد کنندگان کی سہولت کے لیے ون ونڈو نظام بھی قائم کیا جائے گا۔ اس نظام کے ذریعے سرمایہ کاروں اور برآمد کنندگان کو مختلف سرکاری خدمات ایک ہی پلیٹ فارم پر فراہم کرنے کا منصوبہ ہے۔
جنید انوار چوہدری کے مطابق پورٹ قاسم اتھارٹی گارمنٹس سٹی کے لیے ضروری بنیادی سہولیات فراہم کرے گی۔ منصوبے میں ماحول دوست ٹیکنالوجی کے فروغ کو بھی ترجیح دی جائے گی تاکہ صنعتی ترقی کے ساتھ ماحولیاتی تحفظ کو یقینی بنایا جا سکے۔
