امریکی صدر ڈونلڈ ٹرمپ نے ترکیہ سے خفیہ پرواز کے ذریعے واپسی کے واقعے پر گفتگو کی ہے۔
صحافیوں سے بات کرتے ہوئے ٹرمپ نے کہا کہ طیارہ تبدیل کرتے وقت انہوں نے سیکرٹ سروس کی ہدایات پر عمل کیا۔
ان کے مطابق جس طیارے میں وہ سفر کر رہے تھے، اسے زیادہ خطرہ لاحق ہو سکتا تھا۔ ٹرمپ نے کہا کہ انہیں ایران پر بھروسہ نہیں۔
ٹرمپ کی خفیہ واپسی کی تفصیلات
اس سے قبل ایک امریکی اخبار نے گزشتہ ماہ نیٹو اجلاس کے بعد ٹرمپ کی ترکیہ سے واپسی کی تفصیلات رپورٹ کی تھیں۔
رپورٹ کے مطابق ایران سے ملنے والی دھمکیوں کے باعث امریکی صدر کو ترکیہ سے خفیہ طریقے سے روانہ کیا گیا۔
رپورٹ میں بتایا گیا کہ انقرہ ایئرپورٹ پر ٹرمپ کیمروں کے سامنے ایئر فورس ون میں سوار ہوئے۔ تاہم بعد میں انہیں خفیہ طور پر دوسرے طیارے میں منتقل کیا گیا۔
رپورٹ کے مطابق ٹرمپ کو کیٹرنگ ٹرک کے ذریعے ایئر فورس ون سے دوسرے طیارے تک پہنچایا گیا۔ اس کے بعد وہ امریکی فضائیہ کے C-32A طیارے سے برطانیہ روانہ ہوئے۔
صحافیوں کو بھی اصل صورتحال کا علم نہیں تھا
امریکی اخبار کے مطابق ایئر فورس ون میں موجود صحافیوں کو کھڑکیوں کے شیڈ گرانے کی ہدایت کی گئی تھی۔
صحافی اور وائٹ ہاؤس کا عملہ یہی سمجھتا رہا کہ ٹرمپ ایئر فورس ون میں موجود ہیں۔
رپورٹ کے مطابق یہ واضح نہیں کہ برطانیہ پہنچنے کے بعد ٹرمپ کو دوبارہ ایئر فورس ون میں کیسے منتقل کیا گیا۔
