عباسی شہید اسپتال میں دو ماہ سے بند شعبۂ اطفال (پیڈز وارڈ) دوبارہ فعال کر دیا گیا ہے۔ سینئر ڈائریکٹر میڈیکل آفیسر کے ایم سی ڈاکٹر بابر خان نے وارڈ کا دورہ کیا اور بحالی کے انتظامات کا جائزہ لیا۔
طبی عملے کی تعیناتی
ڈاکٹر بابر خان نے بتایا کہ طبی عملے کی کمی کے باعث پیڈز وارڈ عارضی طور پر بند کیا گیا تھا۔ نئے ایف سی پی ایس پوسٹ گریجویٹ ٹرینیز کی تعیناتی کے بعد وارڈ کو دوبارہ بحال کر دیا گیا ہے۔
جدید طبی سہولیات دستیاب
انہوں نے کہا کہ شعبۂ اطفال میں دو جنرل وارڈز، پی آئی سی یو اور این آئی سی یو سمیت جدید طبی سہولیات موجود ہیں۔ وارڈ کی بحالی سے بچوں کے داخلوں اور علاج کی سہولت میں اضافہ ہوگا۔
پی آئی سی یو میں سات بیڈز اور چار مکینیکل وینٹی لیٹرز فعال کر دیے گئے ہیں۔ این آئی سی یو میں 20 انکیوبیٹرز اور دو نیونیٹل وینٹی لیٹرز کے ذریعے نوزائیدہ بچوں کا علاج جاری ہے۔
دوسرا یونٹ بھی جلد بحال ہوگا
ڈاکٹر بابر خان نے بتایا کہ دوسرا جنرل پیڈیاٹرک یونٹ بھی 16 اگست تک بحال کرنے کا منصوبہ ہے۔ انہوں نے کہا کہ شعبۂ اطفال میں غذائی قلت، دمہ اور اعصابی امراض کے خصوصی کلینکس بھی فعال ہیں۔
