یومِ استحصالِ کشمیر کے موقع پر نیشنل ہائی ویز اینڈ موٹروے پولیس نے کشمیری عوام سے بھرپور اظہارِ یکجہتی کیا۔ ترجمان موٹروے پولیس کے مطابق ملک بھر میں خصوصی تقریبات، واکس اور دعائیہ اجتماعات منعقد کیے گئے۔
موٹروے پولیس کے افسران نے ریڈیو پاکستان سے ڈی چوک تک نکالی گئی یکجہتی ریلی میں بھی شرکت کی۔ اس موقع پر انہوں نے کشمیری عوام کی قربانیوں کو خراجِ تحسین پیش کیا اور ان کے حقِ خودارادیت کی مکمل حمایت کا اعادہ کیا۔
ترجمان کے مطابق ملک بھر کے ٹول پلازوں پر خصوصی بینرز آویزاں کیے گئے۔ ان بینرز کے ذریعے یومِ استحصالِ کشمیر کی اہمیت اجاگر کی گئی۔
موٹروے پولیس کے ایف ایم ریڈیو اسٹیشنز سے بھی خصوصی پروگرام نشر کیے گئے۔ ان پروگراموں میں کشمیری عوام کی جدوجہد، قربانیوں اور حقِ خودارادیت پر روشنی ڈالی گئی۔
تقریبات کے اختتام پر پاکستان کی سلامتی، ترقی اور خوشحالی کے لیے خصوصی دعائیں کی گئیں۔ قانون نافذ کرنے والے اداروں اور کشمیری عوام کی کامیابی، استقامت اور آزادی کے لیے بھی دعا کی گئی۔
