ایزل علی کے مبینہ زیادتی اور ہلاکت کے کیس میں کراچی کے علاقے قیوم آباد میں مقتولہ کے والد اور مقامی رہائشیوں نے گرفتار ملزم کے خلاف سخت قانونی کارروائی کا مطالبہ کیا ہے۔ پولیس نے مقدمہ درج کر لیا ہے اور ملزم کو گرفتار کرکے تفتیش شروع کر دی ہے۔
مقتولہ کے والد رانا علی اکبر نے بتایا کہ ملزم ان کا قریبی رشتے دار ہے۔ ان کے مطابق وہ اکثر بچی کو چیز دلانے کے بہانے گھر سے لے جاتا تھا۔ واقعے کے روز بھی وہ بچی کو اپنے ساتھ لے گیا اور تقریباً 20 منٹ بعد واپس لایا۔
والد نے کیا مؤقف اختیار کیا؟
رانا علی اکبر کے مطابق بچی گھر پہنچی تو اس کی حالت غیر معمولی تھی۔ اہلِ خانہ نے ابتدا میں اسے آرام دلانے کی کوشش کی، مگر اس کی طبیعت مسلسل بگڑتی گئی۔ بعد میں اسے الٹیاں شروع ہوئیں۔
انہوں نے بتایا کہ پہلے بچی کو قریبی اسپتال لے جایا گیا۔ بعد ازاں ڈاکٹرز نے جناح اسپتال منتقل کرنے کا مشورہ دیا، لیکن بچی راستے میں دم توڑ گئی۔
والد کا دعویٰ ہے کہ ملزم منان نے بچی پر تشدد اور زیادتی کی، جس کے باعث اس کی موت ہوئی۔ انہوں نے مطالبہ کیا کہ واقعے میں ملوث ہر شخص کے خلاف سخت قانونی کارروائی کی جائے۔
پولیس کی کارروائی اور تحقیقات
پولیس نے والد کی مدعیت میں ڈیفنس تھانے میں مقدمہ درج کر لیا ہے۔ مقدمے میں گرفتار ملزم منان ولد عاشق حسین کو نامزد کیا گیا ہے۔
پولیس کے مطابق بچی کا پوسٹ مارٹم مکمل ہو چکا ہے۔ حتمی رپورٹ آنے کے بعد موت کی وجہ اور مبینہ زیادتی سے متعلق حقائق واضح ہوں گے۔ پولیس کا کہنا ہے کہ ملزم سے تفتیش جاری ہے۔
علاقہ مکینوں کا مطالبہ
قیوم آباد کے رہائشیوں نے وزیراعلیٰ سندھ اور آئی جی سندھ سے مطالبہ کیا ہے کہ کیس کی شفاف تحقیقات کی جائیں۔ انہوں نے کہا کہ قانون کے مطابق ذمہ دار افراد کو سخت سزا دی جائے تاکہ ایسے واقعات کی روک تھام ممکن ہو۔
