کراچی بارش کے حوالے سے محکمہ موسمیات نے پیشگوئی کی ہے کہ شہر میں یکم اگست کی شام سے 2 اگست تک ہلکی سے معتدل بارش کا امکان ہے، جبکہ مضافاتی علاقوں میں کہیں کہیں تیز بارش بھی ہو سکتی ہے۔
کم دباؤ کا نظام کمزور پڑ گیا
محکمہ موسمیات کے مطابق خلیج بنگال میں بننے والا ہوا کا شدید کم دباؤ کمزور ہونا شروع ہو گیا ہے۔
ادارے کا کہنا ہے کہ یہ سسٹم اب ڈیپ ڈپریشن سے ڈپریشن میں تبدیل ہو چکا ہے۔
محکمہ موسمیات کے مطابق یہ نظام اس وقت جنوبی مدھیہ پردیش کے قریب موجود ہے۔
آئندہ 12 گھنٹوں کے دوران اس کی شدت مزید کم ہونے کا امکان ہے، جس کے بعد یہ کم دباؤ میں تبدیل ہو سکتا ہے۔
سندھ کے مختلف علاقوں میں بارش کا امکان
محکمہ موسمیات کے مطابق اس سسٹم کے اثرات سندھ کے مختلف علاقوں تک پہنچ سکتے ہیں۔
تھرپارکر، عمرکوٹ، سانگھڑ، حیدرآباد اور ملحقہ علاقوں میں آج شام یا رات سے 2 اگست تک وقفے وقفے سے بارش متوقع ہے۔
کراچی کا موسم کیسا رہے گا؟
محکمہ موسمیات کا کہنا ہے کہ کراچی میں یکم اگست کی شام سے 2 اگست تک بارش کا امکان ہے۔
شہر میں ہلکی سے معتدل بارش متوقع ہے، جبکہ مضافاتی علاقوں میں بعض مقامات پر تیز بارش ہو سکتی ہے۔
ادارے کے مطابق اس سسٹم کے باعث بحیرہ عرب اور خلیج بنگال سے مون سون ہوائیں ملک کے بالائی اور وسطی علاقوں میں داخل ہو رہی ہیں۔
اس کے ساتھ مغربی ہواؤں کا سلسلہ بھی شمالی علاقوں پر اثر انداز ہے۔
