پاکستان کویت تعلقات کو مزید مضبوط بنانے کے لیے فیلڈ مارشل سید عاصم منیر نے کویتی وزیر خارجہ سے جنرل ہیڈکوارٹرز (جی ایچ کیو) میں ملاقات کی، جس میں باہمی دلچسپی کے امور، علاقائی سلامتی کی صورتحال اور دفاعی و سکیورٹی تعاون کے فروغ پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران دونوں رہنماؤں نے پاکستان اور کویت کے دیرینہ برادرانہ تعلقات کو مزید مستحکم بنانے اور مختلف شعبوں میں تعاون کو وسعت دینے کے عزم کا اظہار کیا۔
آئی ایس پی آر نے بتایا کہ کویتی وزیر خارجہ نے خطے میں امن، استحکام اور سکیورٹی کے فروغ کے لیے پاکستان کے مثبت اور تعمیری کردار کو سراہا۔ انہوں نے دونوں ممالک کے درمیان مضبوط شراکت داری کو مزید وسعت دینے کی خواہش کا بھی اظہار کیا۔
ترجمان پاک فوج کے مطابق فیلڈ مارشل سید عاصم منیر نے اس موقع پر کہا کہ پاکستان اور کویت کے تعلقات باہمی اعتماد اور دیرینہ دوستی پر قائم ہیں۔ انہوں نے اس عزم کا اعادہ کیا کہ پاکستان دونوں ممالک کے درمیان دفاعی، سکیورٹی اور دیگر شعبوں میں تعاون کو مزید فروغ دینے کے لیے پُرعزم ہے۔
فیلڈ مارشل سید عاصم منیر نے کہا کہ پاکستان اور کویت علاقائی امن، استحکام اور خوشحالی کے لیے مشترکہ وژن رکھتے ہیں، جبکہ دونوں ممالک مستقبل میں اپنی شراکت داری کو مزید مضبوط بنانے کے لیے قریبی تعاون جاری رکھیں گے۔
