شکیل مسیح، جو سول اسپتال کراچی کے مردہ خانے میں اسسٹنٹ کے طور پر خدمات انجام دے رہے تھے، پراسرار طور پر لاپتا ہو گئے ہیں۔ پولیس نے اہل خانہ کی درخواست پر مقدمہ درج کر کے مختلف پہلوؤں سے تحقیقات شروع کر دی ہیں۔
پولیس کے مطابق مقدمہ شکیل مسیح کے والد پرویز مسیح کی مدعیت میں درج کیا گیا ہے۔ درخواست میں مؤقف اختیار کیا گیا ہے کہ شکیل مسیح دو روز قبل رات کے وقت اپنی ڈیوٹی مکمل کرنے کے بعد سول اسپتال کراچی کے ٹراما سینٹر سے موٹر سائیکل پر روانہ ہوئے، تاہم گھر نہیں پہنچ سکے۔
مدعی کے مطابق اہل خانہ نے مختلف اسپتالوں اور پولیس تھانوں میں ان کی تلاش کی، لیکن ان کے بارے میں کوئی معلومات نہیں مل سکیں۔ انہوں نے بتایا کہ شکیل مسیح گزشتہ 17 سے 18 برس سے سول اسپتال کراچی میں ملازمت کر رہے ہیں۔
پرویز مسیح کا کہنا ہے کہ ان کے بیٹے کا موبائل فون بھی بند جا رہا ہے اور خاندان کی کسی سے کوئی ذاتی دشمنی نہیں ہے۔ ان کے بقول نامعلوم افراد نے ممکنہ طور پر ان کے بیٹے کو اغوا کیا ہے۔
پولیس حکام کا کہنا ہے کہ مقدمہ درج کر لیا گیا ہے اور واقعے کے تمام ممکنہ پہلوؤں کا جائزہ لیا جا رہا ہے۔ پولیس نے بتایا کہ لاپتا ملازم کی تلاش اور کیس کی تحقیقات جاری ہیں۔
