پیٹرولیم ذخائر بڑھانے کے لیے وزیراعظم شہباز شریف نے متعلقہ اداروں کو ہدایات جاری کر دیں۔ انہوں نے کہا کہ توانائی کے تحفظ کے لیے اسٹریٹجک ذخائر میں اضافہ ضروری ہے۔
اسلام آباد میں وزیراعظم کی زیر صدارت کابینہ کمیٹی برائے توانائی کا اجلاس ہوا۔ اجلاس میں وفاقی وزراء اور متعلقہ سیکریٹریز نے شرکت کی۔
اجلاس میں آئل ریفائنریز کی اپ گریڈیشن پر بریفنگ دی گئی۔ توانائی کے شعبے میں جاری اصلاحات کا بھی جائزہ لیا گیا۔ کمیٹی نے پاکستان آئل ریفائننگ پالیسی 2023 میں مجوزہ ترامیم کی منظوری دے دی۔
وزیراعظم نے کہا کہ آئل ریفائنریز کی اپ گریڈیشن وقت کی اہم ضرورت ہے۔ ان کے مطابق جدید ریفائنریز ملک کی توانائی ضروریات بہتر انداز میں پوری کریں گی۔ انہوں نے اسے قومی توانائی تحفظ کا اہم حصہ قرار دیا۔
شہباز شریف نے تمام اسٹیک ہولڈرز سے قریبی رابطہ رکھنے کی ہدایت دی۔ انہوں نے کہا کہ اصلاحاتی عمل میں مزید تیزی لائی جائے۔ انہوں نے اوگرا کی کارکردگی بہتر بنانے پر بھی زور دیا۔
وزیراعظم نے کہا کہ اصلاحات سے توانائی کے شعبے میں مسابقت بڑھے گی۔ اس سے شفافیت اور سرمایہ کاری کو بھی فروغ ملے گا۔ انہوں نے نئی پالیسی پر بروقت عملدرآمد یقینی بنانے کی ہدایت کی۔
انہوں نے واضح کیا کہ کسی بھی قسم کی غفلت یا تاخیر برداشت نہیں کی جائے گی۔
وزیراعظم نے قطر، سعودی عرب اور دیگر خلیجی ممالک میں روڈ شوز منعقد کرنے کی بھی ہدایت دی۔ ان کا مقصد ترمیم شدہ پاکستان آئل ریفائننگ پالیسی 2023 کو عالمی سرمایہ کاروں کے سامنے پیش کرنا ہے۔
اجلاس کے اختتام پر وزیراعظم نے وزیر پیٹرولیم اور ان کی ٹیم کی کارکردگی کو سراہا۔ انہوں نے ملک میں پیٹرولیم مصنوعات کے اسٹریٹجک ذخائر مزید بڑھانے کی ہدایت بھی جاری کی۔
