ٹریفک حادثہ کراچی کی سپر ہائی وے پر پیش آیا، جہاں بے قابو ٹرک موٹر سائیکل پر چڑھ گیا۔ حادثے میں چچا بھتیجے سمیت تین افراد جان کی بازی ہار گئے۔
پولیس کے مطابق حادثہ سپر ہائی وے پر جمالی پل سے ایوب گوٹھ جانے والے یوٹرن کے قریب پیش آیا۔
تیز رفتار ٹرک، جس کا رجسٹریشن نمبر جے زیڈ 0111 بتایا گیا، ڈرائیور کے قابو سے نکل گیا۔
ٹرک نے موٹر سائیکل، رجسٹریشن نمبر کے ایل ایس 0021، کو ٹکر مار دی۔
ٹی ٹوئنٹی رینکنگ: زمبابوے کے خلاف سیریز میں برتری کے بعد بھارت دوبارہ نمبر ون بن گیا
تین افراد جان سے گئے
ریسکیو ٹیموں نے زخمیوں کو عباسی شہید اور سول اسپتال منتقل کیا۔
تاہم تینوں افراد دورانِ علاج دم توڑ گئے۔
پولیس نے جاں بحق افراد کی شناخت 30 سالہ حبیب، 50 سالہ وقار اور 28 سالہ عدیل کے نام سے کی۔
چچا بھتیجے کام پر جا رہے تھے
پولیس کے مطابق وقار اور حبیب آپس میں چچا بھتیجے تھے۔
دونوں احسن آباد کے رہائشی تھے اور فرنیچر کے کاروبار سے وابستہ تھے۔
حبیب شادی شدہ تھا جبکہ وقار دو بیٹیوں اور ایک بیٹے کے والد تھے۔
پولیس کا کہنا ہے کہ تینوں افراد کام پر جا رہے تھے کہ حادثے کا شکار ہو گئے۔
ڈرائیور گرفتار
ایس ایچ او سائٹ سپر ہائی وے چوہدری محمد نواز کے مطابق ٹرک یوٹرن لیتے وقت بریک فیل ہونے سے بے قابو ہوا۔
حادثے کے فوراً بعد پولیس نے ٹرک کو تحویل میں لے لیا۔
پولیس نے ڈرائیور شہباز کو بھی گرفتار کر لیا ہے۔
پولیس کے مطابق ملزم کے خلاف قانونی کارروائی جاری ہے۔
