بارش کی پیشگوئی کرتے ہوئے محکمہ موسمیات نے کہا ہے کہ مون سون ہوائیں سندھ کے مختلف اضلاع میں مزید بارشیں لائیں گی۔
محکمہ موسمیات کے مطابق جنوب مغربی راجستھان اور اس سے ملحقہ علاقوں میں ہوا کا کم دباؤ موجود ہے۔
ادارے کا کہنا ہے کہ کل اس سسٹم کی شدت میں کمی آنے کا امکان ہے۔
کن علاقوں میں بارش ہوگی؟
محکمہ موسمیات کے مطابق تھرپارکر، عمرکوٹ، میرپورخاص اور گرد و نواح میں موسلا دھار بارش متوقع ہے۔
ٹنڈو محمد خان، ٹنڈو الہ یار اور حیدرآباد میں گرج چمک کے ساتھ بارش کا امکان ظاہر کیا گیا ہے۔
سانگھڑ، شہید بینظیر آباد، کشمور اور جیکب آباد میں بھی گرج چمک کے ساتھ بارش کی پیشگوئی کی گئی ہے۔
شکارپور، سکھر، خیرپور اور نوشہرو فیروز میں بھی بارش متوقع ہے۔
کراچی کا موسم
محکمہ موسمیات نے کہا کہ کراچی میں آئندہ تین روز تک مطلع ابر آلود اور موسم مرطوب رہنے کا امکان ہے۔
آج شہر میں بوندا باندی یا ہلکی بارش ہو سکتی ہے۔
آئندہ تین روز تک وقفے وقفے سے بوندا باندی جاری رہنے کی توقع ہے۔
پیر اور منگل کو تیز ہوائیں بھی چل سکتی ہیں۔
شہر کے مضافاتی علاقوں میں گرج چمک کے ساتھ بارش کا بھی امکان ہے۔
