بہبود آبادی کے حوالے سے وزیراعظم شہباز شریف نے کہا ہے کہ تیزی سے بڑھتی ہوئی آبادی پاکستان کو درپیش سب سے بڑے چیلنجز میں سے ایک ہے۔
وزیراعظم شہباز شریف کی زیر صدارت بہبود آبادی سے متعلق ایک جائزہ اجلاس اسلام آباد میں منعقد ہوا۔ اجلاس میں ملک کی آبادی سے متعلق پالیسی اور اقدامات کا جائزہ لیا گیا۔
وزیراعظم نے نیشنل پاپولیشن کونسل کا اجلاس جلد از جلد بلانے کی ہدایت دی۔
آبادی میں توازن پر زور
شہباز شریف نے کہا کہ آبادی پر قابو پانے کے لیے مؤثر اقدامات کرنا وقت کی اہم ضرورت ہے۔
انہوں نے کہا کہ بہبود آبادی کو قومی فریضہ سمجھا جانا چاہیے۔
وزیراعظم کے مطابق آبادی میں توازن ہی پائیدار قومی ترقی کی ضمانت فراہم کر سکتا ہے۔
صوبوں سے رابطے بہتر بنانے کی ہدایت
وزیراعظم نے کہا کہ آبادی کی منصوبہ بندی کو قومی ترقی اور معاشی استحکام کے اہداف سے ہم آہنگ کرنا ضروری ہے۔
انہوں نے متعلقہ اداروں کو ہدایت دی کہ بہبود آبادی سے متعلق اقدامات کے لیے صوبوں کے ساتھ رابطے اور تعاون مزید مضبوط بنایا جائے۔
عوامی آگہی مہم کی ضرورت
شہباز شریف نے کہا کہ بڑھتی ہوئی آبادی پر قابو پانے کے لیے مؤثر عوامی آگہی مہم ناگزیر ہے۔
انہوں نے اس بات پر زور دیا کہ عوام میں شعور اجاگر کیے بغیر بہبود آبادی کے اہداف حاصل کرنا مشکل ہوگا۔
